नुवाकोट पुकार
काठमाडौं । अर्जेन्टिनाका महान् फुटबलर लियोनेल मेस्सीले अन्तर्राष्ट्रिय फुटबलबाट सन्यास लिने घोषणा गरेका छन्। २० वर्षभन्दा लामो समय अर्जेन्टिनाको राष्ट्रिय टोलीबाट खेलेका मेस्सीले सोमबार सामाजिक सञ्जालमार्फत भावुक सन्देश सार्वजनिक गर्दै राष्ट्रिय टोलीबाट आफ्नो यात्रा टुंग्याउने निर्णय सुनाएका हुन्।
मेस्सीका अनुसार उनले यो निर्णय विश्वकप फाइनलपछि लामो समय सोचेर लिएका हुन्। उनले आफूले राष्ट्रिय टोलीको जर्सीका लागि सुरुदेखि नै आफ्नो सबैथोक दिएको र अब युवा खेलाडीहरूलाई अवसर दिने समय आएको बताएका छन्।
मेस्सीले सामाजिक सञ्जालमा लेखेका छन् :
“फाइनलपछि यति समय बितिसकेपछि, यसबारे धेरै सोचिसकेँ। अब म सबैलाई जानकारी गराउन चाहन्छु—मैले राष्ट्रिय टोलीबाट सन्यास लिने निर्णय गरेको छु।
यो निर्णयले मेरो आत्मालाई त्यतिबेला पनि चोट पुर्याएको थियो र अहिले पनि दुखिरहेको छ। तर म बुझ्छु, अब यही सही समय हो। म कसम खाएर भन्न सक्छु—मैले सधैं आफ्नो सबैथोक दिएको छु। पछिल्ला केही वर्षमा सबै उपाधि जितेका बेला मात्र होइन, सुरुदेखि नै मैले यो जर्सीका लागि लडेको छु र आफ्नो सबैथोक दिएको छु। फुटबलमार्फत तपाईंहरूलाई खुसी बनाउन र अर्जेन्टिनी भएकोमा गर्व गर्ने अवसर दिलाउन मैले सधैं प्रयास गरेको छु।
अब धेरै समय बाँकी छैन र केही अध्यायहरू बन्द हुँदैछन्। यो अध्याय भने मलाई निकै पीडादायी लागिरहेको छ। राष्ट्रिय टोलीमा रहन मलाई सधैं मन पर्थ्यो, मैले यसलाई धेरै माया गरेँ र सधैं माया गरिरहनेछु। मैले आफूभित्र भएको सबैथोक दिएँ। अब मसँग दिनका लागि थप केही बाँकी छैन। त्यसमाथि, निकै प्रतिभाशाली युवा खेलाडीहरू पनि आइरहेका छन्, जो राष्ट्रिय टोलीमा स्थान पाउन योग्य छन्।
यी २० वर्षमा तपाईंहरूले दिनुभएको सम्पूर्ण मायाका लागि धन्यवाद। टोलीभित्रबाट तपाईंहरूको समर्थन र आवाज सुन्ने कुरा म धेरै सम्झनेछु। अब म तपाईंहरूमध्ये एक हुनेछु—बाहिरबाट सधैं अर्जेन्टिनाको समर्थन र हौसला बढाइरहनेछु, राम्रो समयमा पनि र खराब समयमा झन् बढी।
सधैं मेरो साथमा रहनुभएको र यो सुन्दर तर कठिन यात्रामा मलाई साथ दिनुभएको मेरो परिवारलाई धन्यवाद। मैले सँगै काम गर्ने अवसर पाएका प्रत्येक प्रशिक्षक, सहकर्मी खेलाडी र पदाधिकारीहरूलाई पनि धन्यवाद। म आफूसँग अविस्मरणीय सम्झना र जीवनभर नबिर्सने क्षणहरू लिएर जाँदैछु।
म शान्ति र गर्वका साथ बिदा हुँदैछु—आफ्ना सहकर्मीहरूसँग मिलेर तपाईंहरूलाई सपनाजस्ता क्षणहरू दिन सकेँ। तपाईंहरूसँग यो सबै अनुभव गर्न पाउनु साँच्चिकै अविश्वसनीय थियो। म तपाईंहरूलाई माया गर्छु।
मलाई अर्जेन्टिनी बनाइदिनुभएकोमा भगवानलाई धन्यवाद।
गो अर्जेन्टिना !”
मेस्सीले उक्त सन्देशको अन्त्यमा आफूले यो शब्दहरू जुलाई २१ अर्थात् विश्वकप फाइनलको दुई दिनपछि नै लेखेको पनि बताएका छन्। पछिल्लो परिस्थितिपछि आफू आफ्नो निर्णयमा पहिलेभन्दा पनि बढी विश्वस्त भएको उनको भनाइ छ।
२०२६ को विश्वकप फाइनलमा अर्जेन्टिना स्पेनसँग १–० ले पराजित भएपछि मेस्सीको अन्तर्राष्ट्रिय भविष्यबारे चर्चा तीव्र बनेको थियो। फाइनलपछि भने उनले तत्काल सन्यासको घोषणा गरेका थिएनन्।
मेस्सीको सन्याससँगै अर्जेन्टिनाको राष्ट्रिय टोलीमा उनको दुई दशक लामो अविस्मरणीय यात्रा औपचारिक रूपमा टुंगिएको छ। उनले अब राष्ट्रिय टोलीलाई मैदानबाहिरबाट समर्थकका रूपमा साथ दिने बताएका छन्।
तपाईको प्रतिक्रिया दिनुहोस्