काठमाडौं, कात्तिक ११ गते । नेपाली कांग्रेसका सभापति एवम् पूर्व प्रधानमन्त्री शेरबहादुर देउवाले कांग्रेस लोकतान्त्रिक पार्टी हुनाका नाताले राजनीतिक दलहरुप्रतिको आलोचनालाई सकारात्मकरुपमा लिएको बताउनुभएको छ ।
बडादसैं, तिहार, नेपाल संवत् र छठलगायत पर्वका अवसर पारेर कांग्रेसले पार्टी केन्द्रीय कार्यालयमा आयोजना गरेको चियापान तथा शुभकामना आादनप्रदान कार्यक्रममा सञ्चारकर्मीसँग कुरा गर्नुहुँदै उहाँले भन्नुभयो, “दलहरुप्रति आएको आलोचना र टिप्पणीलाई मैले सकारात्मक लिएको छु ।”
राजनीतिक दलहरुले आफूलाई जनताका बीचमा लोकप्रियता हासिल गर्न राम्रोसँग काम गर्नुपर्ने आवश्यकता औँल्याउँदै उहाँले सबै राजनीतिक दलप्रति जनताको आशा र भरोसा उत्तिकै कायम रहेको दाबी गर्नुभयो । सभापति देउवाले भन्नुभयो, “ राजनीतिक दल र राज्यका संस्थाप्रति विश्वास घटेको छैन ।”
कांग्रेस पार्टीभित्र बेमेल भइरहेको छ नि भन्ने सञ्चारकर्मीको जिज्ञाशामा उहाँले पार्टीभित्र बेमेल रहेको कुरा सत्य होइन भन्नुभयो । उहाँले भन्नुभयो, “दलभित्रको फरक मत हुन सक्लान,यसलाई हामीले व्यवस्थापन गरिरहेका छौँ ।”
चियापान समारोहमा प्रधानमन्त्री पुष्पकमल दाहाल, नेकपा एमालेका अध्यक्ष तथा पूर्व प्रधानमन्त्री केपी शर्मा ओली पनि सानेपा पुगेका शुभकामना दिनुभएको थियो । सो अवसरमा प्रधानमन्त्री दाहालले पूराना राजनीतिक दलहरु एक ठाउँमा उभिएर दलहरुप्रतिको जनतामा देखिएको नैराश्यकतालाई हटाउने विश्वास व्यक्त गर्नुभयो । उहाले आफू पूराना दलहरु एक ठाउँमा उभिएर देशको विकासका लागि सहकार्य गर्ने कुरा प्रतिवद्ध रहेको भन्दै त्यसैका लागि राजनीतिक भेटघाटमा सक्रिय भएको बताउनु भयो ।
उक्त कार्यक्रममा राष्ट्यि स्वतन्त्र पार्टीका रवि लामिछानेले दलहरुको समस्या साझा रहेको भन्दै आफू पूराना दलहरुको विकल्पको रुपमा आएको नभई सबैसँग मिलेर देश विकासमा लाग्ने उल्लेख गर्नुभएको थियो । चियापान समारोहका विभिन्न राजनीतिक दलका नेता, कार्यकर्ता, कुटनैतिक नियोगका प्रमुख तथा प्रतिनिधिहरुसहित नेपाली कांग्रेसका नेता कार्यकर्ताले कांग्रेस पार्टी कार्यालय सानेपा भरिभराउ थियो । शुभकामना आदानप्रदान कार्यक्रममा सभामुख देवराज घिमिरे, पूर्वसभामुखद्वय दमननाथ ढुङ्गाना र अग्निप्रसाद सापकोटा, नेपालका लागि चिनियाँ राजदूत चेन सङलगायत विशिष्ट व्यक्तित्वको सहभागिता थियो ।
सहभागिहरुलाई मञ्चमा सभापति देउवा, उपसभापति धनराज गुरुड.,गोपालमान श्रेष्ठसहितका नेताहरुले स्वागत गर्नुभएको थियो भने तल पार्टीका पदाधिकारी तथा केन्द्रीय सदस्यहरुले स्वागत गर्नुभएको थियो । कांग्रेसले हरेक वर्ष कोजागत पूर्णीमाका दिन चियापान कार्यक्रम आयोजना गर्दै आएको छ । एमालेले भने कात्तिक १५ गते चियापान कार्यक्रम गर्दै छ ।
सो अवसरमा नेकपा (एकीकृत समाजवादी)का अध्यक्ष एवम् पूर्वप्रधानमन्त्री माधवकुमार नेपालले सङ्कटका बेला दल हातेमालो गर्दै अगाडि बढेको विगतका घटना स्मरण गर्दै अबका चुनौतीलाई हल गर्न पनि दल एक हुनुपर्ने बताउनुभयो । राष्ट्रिय स्वतन्त्र पार्टीका अध्यक्ष रवि लामिछानेले दलबीच सद्भाव बाँड्ने परम्पराका रुपमा चियापान कार्यक्रम हुँदै आएको उल्लेख गर्दै चियापानले दलहरुप्रति संवाद आदानप्रदान हुने विश्वास व्यक्त गर्नुभयो ।
