नुवाकोट पुकार
काठमाडौँ – राष्ट्रिय स्वतन्त्र पार्टी (रास्वपा)ले जिल्ला अधिवेशन सञ्चालनसम्बन्धी कार्यविधि सार्वजनिक गर्दै विभिन्न पदका उम्मेदवारका लागि मनोनयन शुल्क निर्धारण गरेको छ।
सार्वजनिक कार्यविधिअनुसार जिल्ला सभापति पदका उम्मेदवारले ५ हजार रुपैयाँ शुल्क तिर्नुपर्ने व्यवस्था गरिएको छ। उपसभापति, सचिव, सहसचिव तथा कोषाध्यक्ष पदका उम्मेदवारका लागि समान शुल्क तोकिएको छ भने जिल्ला सदस्य पदका आकांक्षीका लागि १ हजार रुपैयाँ शुल्क निर्धारण गरिएको उल्लेख छ।
त्यस्तै निर्वाचन क्षेत्रस्तरका उपसंयोजक तथा सचिव पदका उम्मेदवारले १ हजार रुपैयाँ बुझाउनुपर्नेछ भने सदस्य पदका लागि ५ सय रुपैयाँ शुल्क तोकिएको छ।
रास्वपाको विधानअनुसार जिल्ला समितिमा सभापति, उपसभापति, सचिव र सहसचिव एक–एक जना रहने व्यवस्था छ। साथै सम्बन्धित जिल्लामा बहुलता रहेको जातीय क्लष्टर, दलित सदस्य तथा प्रतिनिधि सभा निर्वाचन क्षेत्रबाट एक–एक जना सदस्य निर्वाचित हुने प्रावधान राखिएको छ। यसबाहेक थप तीन जना सदस्य रहने व्यवस्था पनि गरिएको छ।
कार्यसमिति विषम संख्या कायम हुने गरी जिल्ला सभापतिलाई आवश्यकता अनुसार दुई वा तीन जना सदस्य मनोनयन गर्ने अधिकार दिइएको छ। साथै जिल्ला अन्तर्गतका सभापतिहरू पदेन सदस्य रहने व्यवस्था पनि कार्यविधिमा समावेश गरिएको छ।
पार्टीले आगामी असार ७ देखि ९ गतेसम्म पहिलो महाधिवेशन आयोजना गर्ने निर्णय गरिसकेको छ। त्यसअघि जेठ २३ र २४ गते जिल्ला अधिवेशन सम्पन्न गर्ने तालिका तय गरिएको छ।
कार्यविधिमार्फत जिल्ला अधिवेशनमा सहभागी हुने प्रतिनिधिको दायरा समेत निर्धारण गरिएको छ। जिल्ला समितिका पदाधिकारी, सल्लाहकार परिषद्, अनुशासन आयोग, विभिन्न विभाग, सम्पर्क विभाग तथा निर्वाचन क्षेत्रीय समितिका प्रतिनिधिहरू अधिवेशनमा सहभागी हुने व्यवस्था गरिएको छ।
यसका अतिरिक्त पालिका समिति, जनप्रतिनिधि तथा प्रदेश सभा क्षेत्रअन्तर्गतका विभिन्न संरचनाका सदस्यलाई समेत जिल्ला अधिवेशन प्रतिनिधिका रूपमा सहभागी गराइने उल्लेख गरिएको छ।
तपाईको प्रतिक्रिया दिनुहोस्