नुवाकोट पुकार
काठमाडौं । विश्व फुटबलमा केही खेलाडी उत्कृष्ट हुन्छन्, केही महान् बन्छन्, तर केही यस्ता पनि हुन्छन् जो समयभन्दा माथि उठेर इतिहासकै पर्याय बन्छन्। लियोनेल मेस्सी त्यही दुर्लभ श्रेणीका खेलाडी हुन्। चार वर्षअघि कतार विश्वकप जितेपछि धेरैले मेस्सीको विश्वकप यात्रा त्यहीँ समाप्त भएको ठानेका थिए। ३५ वर्षको उमेरमा उनले बाल्यकालदेखिको सपना पूरा गरेका थिए। विश्वकपको ट्रफी उचाल्दै उनले आफ्नो करियरको सबैभन्दा ठूलो अध्याय लेखिसकेका थिए। त्यसैले धेरैको निष्कर्ष थियो— अब मेस्सी विश्वकपमा देखिने छैनन्।
तर महान् खेलाडीहरू आफ्नै कथा आफैं लेख्छन्।
३९ वर्ष पुगेका मेस्सी अहिले फेरि विश्वकपको सबैभन्दा ठूलो मञ्चमा उभिएका छन्। उमेर बढ्दै जाँदा गति घट्न सक्छ, तर फुटबल बुझ्ने क्षमता, खेल पढ्ने कला र निर्णायक क्षण सिर्जना गर्ने प्रतिभा भने झन् परिपक्व बनेको देखिन्छ।
इङ्ल्यान्डविरुद्धको सेमिफाइनल त्यसैको जीवन्त उदाहरण बन्यो।
अर्जेन्टिना एक गोलले पछि परेपछि धेरैको नजर कप्तान मेस्सीतर्फ थियो। उनी दौडिएर होइन, दिमागले खेल जिताउने खेलाडी हुन्। खेलको अन्तिम समयमा उनले मैदानको लय नै परिवर्तन गरिदिए। दुई उत्कृष्ट असिस्ट गर्दै उनले अर्जेन्टिनालाई २–१ को पुनरागमन जित दिलाए र लगातार दोस्रो पटक विश्वकपको फाइनलमा पुर्याए।
आँकडाले पनि मेस्सीको प्रभाव स्पष्ट देखाउँछ। उनले नौ सफल ड्रिबल गरे, चार स्पष्ट अवसर सिर्जना गरे, विपक्षीको पेनाल्टी क्षेत्रमा सात पटक बल छोए र खेलभरि सबैभन्दा धेरै नौ क्रस उपलब्ध गराए। इङ्ल्यान्डको सम्पूर्ण टोलीले संयुक्त रूपमा पूरा गरेका सफल ड्रिबलभन्दा मेस्सी एक्लैले बढी सफल ड्रिबल गरेका थिए। अर्जेन्टिनाका प्रशिक्षक लियोनेल स्कालोनीका अनुसार, उनी इतिहासकै महान् खेलाडी हुन्। अब उनले आफूलाई प्रमाणित गर्न बाँकी केही छैन।
बीबीसीका विश्लेषक मीका रिचर्ड्सले पनि मेस्सीको प्रदर्शनलाई असाधारण भन्दै टिप्पणी गरे, यस्ता खेलमा फरक पार्ने खेलाडी नै महान् हुन्छन्। अर्जेन्टिनासँग त्यही खेलाडी छन्— लियोनेल मेस्सी। इङ्ल्यान्डका कप्तान ह्यारी केनले समेत मेस्सीको प्रशंसा गर्न बाध्य भए। उनका अनुसार, ,हामीले धेरै समयसम्म उनलाई नियन्त्रणमा राख्यौं। तर विश्वका महान् खेलाडीहरूलाई एक क्षण मात्र पर्याप्त हुन्छ। उनले त्यही गरे।,
२०२६ को विश्वकपमा मेस्सीले हालसम्म आठ गोल र चार असिस्ट गरेका छन्। उनी प्रतियोगिताका संयुक्त सर्वाधिक गोलकर्ता तथा दोस्रो सर्वाधिक असिस्टकर्ता हुन्। अझ महत्त्वपूर्ण कुरा, उनी केवल गोल गर्ने खेलाडी होइनन्स टोलीलाई जिताउने खेलाडी हुन्। अब अर्जेन्टिनाको अगाडि स्पेनसँगको फाइनल छ। त्यो खेल केवल अर्को विश्वकप फाइनल मात्र हुनेछैन, बरु सम्भवतः विश्व फुटबलका सर्वकालीन महान् खेलाडीको अर्को ऐतिहासिक अध्याय पनि हुनेछ।
मेस्सीले समयलाई चुनौती दिइरहेका छन्। उमेरले उनको खुट्टाको गति केही कम गरेको हुन सक्छ, तर खेललाई नियन्त्रण गर्ने कला, दबाबमा निर्णय गर्ने क्षमता र असम्भवलाई सम्भव बनाउने प्रतिभा अझै उस्तै छ।सायद यही कारण हो— विश्व फुटबलमा नयाँ स्टारहरू जन्मिरहन्छन्, तर जब निर्णायक क्षण आउँछ, संसारको नजर फेरि एउटै खेलाडीतर्फ जान्छ।
त्यो नाम हो— लियोनेल मेस्सी।
बीबीसी स्पोर्ट्सबाट प्राप्त अग्रेजी संस्करण रुपान्तरण गरिप्रकाशित गरिएको
तपाईको प्रतिक्रिया दिनुहोस्