विश्व फुटबलका महान् खेलाडी मेस्सीका पिता जर्जको निधन

काठमाडौं । अर्जेन्टिना तथा एफसी बार्सिलोनाका महान् फुटबलर लियोनल मेस्सीका पिता जर्ज मेस्सीको ६८ वर्षको उमेरमा निधन भएको छ।

अर्जेन्टिना र स्पेनका विभिन्न सञ्चारमाध्यमका अनुसार जर्जको शुक्रबार राति करिब १० बजे अर्जेन्टिनाको रोसारियोस्थित आफ्नै गृहशहरमा निधन भएको हो। उनी लामो समयदेखि स्वास्थ्य समस्यासँग जुधिरहेका थिए।

जर्ज मेस्सी लियोनल मेस्सीका पिता मात्र थिएनन्, उनको फुटबल यात्राका महत्वपूर्ण मार्गदर्शक र व्यावसायिक सहयोगीसमेत थिए। मेस्सी बाल्यकालदेखि नै फुटबलमा अघि बढ्दा जर्जले उनको प्रशिक्षण, करियर व्यवस्थापन र व्यावसायिक यात्रामा महत्वपूर्ण भूमिका निर्वाह गरेका थिए।

रोसारियोमा हुर्किएका मेस्सीलाई बाल्यकालमै फुटबलतर्फ अघि बढाउन जर्जको ठूलो योगदान थियो। मेस्सी चार वर्षको उमेरमा स्थानीय क्लब ग्रान्डोलीमा खेल्न थालेका थिए। त्यहाँ उनको प्रशिक्षणसँग जर्ज पनि जोडिएका थिए।

मेस्सी करिब १० वर्षको हुँदा उनलाई ग्रोथ हर्मोनसम्बन्धी समस्या देखिएको थियो। त्यसको उपचार खर्च परिवारका लागि ठूलो चुनौती बनेको थियो। त्यसपछि मेस्सीको फुटबल करियरलाई निरन्तरता दिन जर्जले महत्वपूर्ण भूमिका खेले। अन्ततः १३ वर्षको उमेरमा मेस्सी स्पेन पुगे र एफसी बार्सिलोनाको चर्चित एकेडेमी ला मासियामा प्रवेश गरे।

त्यसपछि मेस्सी विश्व फुटबलकै महान् खेलाडीमध्ये एक बने। बार्सिलोना, पेरिस सेन्ट जर्मेन, इन्टर मियामी तथा अर्जेन्टिना राष्ट्रिय टोलीसम्मको यात्रामा जर्ज निरन्तर उनको साथमा रहे। विशेषगरी मेस्सीका अनुबन्ध, व्यावसायिक सम्झौता, इमेज राइट्स तथा अन्य व्यावसायिक गतिविधिमा जर्जको महत्वपूर्ण भूमिका थियो।

विश्वकपका क्रममा पनि चर्चामा थियो जर्जको स्वास्थ्य
सन् २०२६ को विश्वकपका क्रममा पनि जर्ज मेस्सीको स्वास्थ्य अवस्थालाई लिएर अन्तर्राष्ट्रिय रूपमा चर्चा भएको थियो। अर्जेन्टिनाले अल्जेरियालाई ३–० ले हराएको खेलमा मेस्सीले ह्याट्रिक गरेका थिए। पहिलो गोल गरेपछि मेस्सी भावुक हुँदै आँसु पुछेको दृश्य विश्वभर चर्चित बनेको थियो।

खेलपछि मेस्सीले आफू केही कठिन व्यक्तिगत परिस्थितिबाट गुज्रिरहेको र आफ्नो भावुकता फुटबलसँग मात्र सम्बन्धित नभएको बताएका थिए। त्यसपछि उनका पिता जर्जको स्वास्थ्य अवस्थाबारे विभिन्न अड्कलबाजी सुरु भएको थियो।

त्यस समयमा मेस्सी परिवारले जर्ज स्वास्थ्य समस्याबाट गुज्रिरहेको र चिकित्सकीय निगरानीमा उपचार भइरहेको पुष्टि गरेको थियो। परिवारले उनको स्वास्थ्यमा सुधार भइरहेको जनाएको थियो भने अपुष्ट समाचार तथा अनुमानप्रति आपत्ति जनाउँदै गोपनीयताको सम्मान गर्न आग्रह गरेको थियो।

त्यस क्रममा जर्जको निधन भएको भन्दै एउटा गलत खबरसमेत सार्वजनिक भएको थियो। अर्जेन्टिनाकी टेलिभिजन प्रस्तोता फ्लोरेन्सिया पेञाले प्रत्यक्ष प्रसारणमै जर्जको निधन भएको गलत सूचना दिएकी थिइन्। पछि मेस्सी परिवारले उनी जीवित रहेको स्पष्ट पारेपछि उक्त समाचार गलत सावित भएको थियो। घटनापछि प्रस्तोताले माफी मागेकी थिइन्।

तर अहिले करिब दुई महिनापछि जर्ज मेस्सीको वास्तविक निधन भएको खबर अन्तर्राष्ट्रिय सञ्चारमाध्यमहरूले सार्वजनिक गरेका छन्। Goal.com लगायतका सञ्चारमाध्यमका रिपोर्टअनुसार उनको ६८ वर्षको उमेरमा निधन भएको हो।

लियोनल मेस्सीको विश्व फुटबल यात्रामा पर्दापछाडिबाट निरन्तर साथ दिने व्यक्तिका रूपमा जर्जको भूमिका विशेष मानिन्छ। छोरालाई बाल्यकालदेखि विश्व फुटबलको सर्वोच्च उचाइसम्म पुर्‍याउने यात्रामा उनले खेलेको भूमिकालाई मेस्सीको सफलताको महत्वपूर्ण आधारका रूपमा लिइन्छ।

जर्जको निधनसँगै लियोनल मेस्सीले आफ्नो जीवनका महत्वपूर्ण अभिभावक, मार्गदर्शक तथा व्यावसायिक सहयोगी गुमाएका छन्।