काठमाण्डौ – नेपाली कांग्रेसका महामन्त्री एवम् सांसद गगन थापाले आम रुपमा चर्चामा आएका सबै भ्रष्टाचारका विषयमा सरकारले प्रष्ट पार्नुपर्ने बताउनु भएको छ । बुँदागत रुपमा विषय समेटेर बोल्नु भएका थापाले यि सबै विषयमा वर्तमान सरकारले प्रष्ट पार्नुपर्ने उल्लेख गर्नुभयो ।
सरकार निरन्तरताको प्रयाय भएको भन्दै नियम, कानून र प्रमाणका आधारमा सबैविषयको छानविन हुनुपर्ने र त्यसको प्रष्ट जानकारी सदनलाई गराउनु पर्नेमा जोड दिनुभयो । उहाँले विद्युत महसुलका विषयमा उद्योगबाट उठाउनुपर्ने एक रुपैयाँ पनि छाड्न नहुने बताउनुएको छ ।
संसद्को विशेष समयमा बोल्दै महामन्त्री थापाले प्रधानमन्त्री केपी शर्मा ओलीले उद्योगको लाइन जोड्न निर्देशन दिँदै अनावश्यक रकम लाद्न खोजिएको बताउनुभएको विषयतर्फ सङ्केत गर्दै लहड र आदेशमा त्यसो गर्न नपाइने बताउनुभएको हो ।
थापाले डेडिकेटेड र ट्रङ्क लाइनको सुविधा लिएका उद्योगलाई सरकारले एक रुपैयाँ पनि छुट दिन नपाउने भन्दै लहड र आदेशले बक्यौता छुट दिन नपाइने उल्लेख गर्नुभयो । अदालत, संसदीय समिति र आयोगले गरेका निर्णय बाहिर गएर दायाँबायाँ गर्ने अधिकार सरकारलाई नभएको उहाँको भनाइ छ ।
डेडिकेटेड र ट्रङ्क लाइनको महसूल विवादबारे यसअघिका सरकारले दर्जनौँ निर्णय गरेका, अदालतले फैसला गरेको, संसदीय समितिले निर्णय गरेको र लाल आयोग बनाएको स्मरण गराउँदै महामन्त्री थापाले कुनै पनि नयाँ सरकारले यो सबै कुराबाट अलग भएर निर्णय गर्न नपाउने बताउनुभयो । उहाँले बक्यौता उठाउने कुरामा सरकारले विश्वास दिलाउनुपर्ने पनि बताउनुभयो ।
थापाले भुटानी शरणार्थी, गिरीबन्धु टी स्टेट, सहकारी ठगी लगायतका भ्रष्टाचारका फाइल यो सरकारले खोल्नुपर्ने पनि उल्लेख गर्नुभयो ।
यस्तै बैठकमा प्रमुख प्रतिपक्ष दल नेकपा ९माओवादी केन्द्र० का सांसद महेन्द्रबहादुर शाहीले डेडिकेटेड र ट्रङ्क लाइनको बक्यौता रकम असुलीबारे छानबिन गर्न संसदीय समिति गठन गर्न सरकारसँग माग गर्नुभएको छ ।
