काभ्रे — जनप्रतिनिधिहरु कमाउनका लागि मात्रै लागिरहेका छन् भन्ने आम आशंकालाई चिर्दै एक जना मेयरले आफ्नो हालसम्मको सेवा सुविधाको सबै रकम बाढी पहिरो प्रभावितलाई दिने घोषणा गरेका छन् । पाँचखाल नगरपालिकाका प्रमुख महेश खरेलले आफ्नो सेवासुविधावापत आउने रकम बाढीपहिरो प्रभावित स्थानीय तहलाई दिने घोषणा गरेका छन् । खरेल नेपाली कांग्रेसबाट निर्वाचित मेयर हुन् । उनी पूर्वमन्त्री राजेन्द्र खरेका छोरा हुन ।
आइतबार बसेको कार्यपालिकाको बैठकबाट आधिकारिक निर्णय नै गराएर मेयर खरेलले आफ्नो तीन वर्षको नगरबाट प्राप्त हुने सेवासुबिधा काभ्रेपलान्चोक जिल्लामा गतसाताको वर्षाका कारण क्षति भएका पालिकाहरुलाई राहत स्वरूप सहयोग गर्ने घोषणा गरेका हुन् ।उनले आफ्नो सेवासुविधावापत तीन वर्षको एकमुष्ट १५ लाख रुपैयाँ हुने र त्यो सबैं बाढीपहिरो प्रभावित स्थानीय तहलाई हस्तान्तरण गर्ने घोषणा गरेका हुन् ।
पाँचखाल नगर भन्दा अन्य पालिकामा धेरै नै जनधनको क्षति भएकोले उहाँहरुलाई सानो भएपनि सहयोग होस् भनेर यो निर्णय गरेको हुँ,ु खरेलले भने । खरेलसहितका नेताहरुले नमोबुद्द, रोशी, पनौती, बेथानचोक, पाँचखाल, मण्डनदेउपुर लगायतका पालिकाहरुमा खाद्यान्न र त्रिपालसमेत वितरण गरेका छन् ।
