विदुर । नेकपा एमाले नुवाकोटको दोस्रो पूर्ण बैठक आज विदुरमा बसेको छ । पार्टी स्थायी कमिटिका सदस्य तथा बागमती प्रदेश इन्चार्ज डा. राजन भट्टराईको प्रमुख आतिथ्यतामा बसेको बैठकले पार्टीको प्रदेश तथा क्षेत्रीय तहमा नेतृत्व चयन गरेको छ । जिल्ला अध्यक्ष बद्री मैनालीका अनुसार बैठकले क्षेत्र नं १ को अध्यक्षमा सुशिल खड्का र क्षेत्र नं २ को अध्यक्षमा समर बहादुर आलेमगरलाई चयन गरेको छ ।
अध्यक्ष मैनालीको सभापतित्वमा भएको पूर्ण बैठकमा पार्टीका नेताहरु केशव पाण्डे, नारायण खतिवडा, ठाकुर गजुरेल, विन्दा ढुंगाना, केपी लामिछाने,बुद्धि प्रधान लगायतका जिल्ला तहका अन्य नेताहरुको पनि उपस्थिति रहेको थियो । एमालेले क्षेत्रको जिम्मेवारी दिएका मध्ये क्षेत्र नं १ का अध्यक्ष खड्का गत स्थानीय निर्वाचनमा नेपाली कांग्रेस छाडेर नेकपा एमाले प्रवेश गरेका हुन । उनी कांग्रेसको १४ औं महाधिवेशनबाट कांग्रेस क्षेत्र नं १ को प्रदेश क को सभापति थिए ।
स्थानीय तहको निर्वाचनमा आफू निकट मानिएका योगिन्द्रसिंह लामाड.ले दुप्चेश्वर गाउँपालिकाको अध्यक्षमा टिकट नपाएपछि
तामाड. र खड्का दुवै एमाले प्रवेश गरेका थिए । योगिन्दसिंह तामाड. कांग्रेसमा फर्किएका सक्रिय राजनीति गरिरहेका छन् भने खड्का एमालेमा सक्रिय छन् । यस्तै समर आलेमगर भने एमालेबाट २०५४ सालमा नै तारुका गाविसको अध्यक्ष थिए भने यसअघि २०७४ मा भएको निर्वाचनमा वडा अध्यक्षमा निर्वाचित भएका थिए । उनी जिल्ला कमिटि सदस्यबाट क्षेत्रीय अध्यक्षको जिम्मेवारीमा पुगेका हुन । यस्तै बैठकले प्रदेश संयोजकहरु पनि चयन गरेको बताइएको छ ।
