काठमाडौँ । जनवादी गणतन्त्र चीन सरकारको निमन्त्रणामा औपचारिक भ्रमणका लागि प्रधानमन्त्री केपी शर्मा ओली आज चीन प्रस्थान गर्नुभएको छ ।
प्रधानमन्त्री ओलीलाई अन्तर्राष्ट्रिय विमानस्थलमा उपप्रधानमन्त्री प्रकाशमान सिंह, संस्कृति, पर्यटन तथा नागरिक उड्डयनमन्त्री बद्री पाण्डेलगायतले बिदाइ गर्नुभयो । प्रधानमन्त्री ओली नेतृत्वको भ्रमण टोली हिमालयन एयरलाइन्सको विशेष चार्टर विमानबाट अपराह्न ११ बजे चीन प्रस्थान गरेको हो ।
भ्रमण दलमा प्रधानमन्त्री ओलीसहित उहाँकी धर्मपत्नी राधिका शाक्य, परराष्ट्रमन्त्री डाक्टर आरजु राणा देउवा, प्रधानमन्त्रीका मुख्य सल्लाहकार विष्णु रिमाल, प्रधानमन्त्रीका आर्थिक तथा विकास सल्लाहकार डाक्टर युवराज खतिवडा,नेपाली कांग्रेसका नेता अर्जुननरसिंह केसी, सिता गुरुड. लगायत अन्य सरकारी प्रतिनिधि र निजी क्षेत्रका प्रतिनिधिहरुको सहभागिता रहेको छ । प्रधानमन्त्रीको भ्रमण टोलीमा ३९ सदस्य रहेका छन् भने नीजि क्षेत्रबाट झण्डै ५० जनाको टोली रहेको छ ।
चिनिया समकक्षीको निमन्त्रणामा चीन प्रस्थान गर्नुभएका प्रधानमन्त्री ओली मङ्सिर २० गते नेपाल फर्कनु हुने कार्यक्रम रहेको छ ।
