नुवाकोट पुकार
काठमाडौं, जेठ २८ — नेपाली कांग्रेसको क्रियाशील सदस्यता अद्यावधिक अभियान अन्तर्गत हालसम्म ५ लाख ८२ हजारभन्दा बढी सदस्य अद्यावधिक प्रक्रियामा सहभागी भएका छन्। पार्टीले सदस्यता अद्यावधिकका लागि तोकेको अन्तिम समयसीमा सकिन अब एक दिन मात्र बाँकी रहेको जनाएको छ।
कांग्रेसका महामन्त्री तथा सदस्यता व्यवस्थापन केन्द्रीय समितिका संयोजक प्रदीप पौडेल ले जारी गरेको अपिलअनुसार क्रियाशील सदस्यता अद्यावधिक गर्ने अवधि २०८३ जेठ २८ गते राति १२ बजेसम्म कायम रहनेछ।
पार्टीका अनुसार अद्यावधिक गर्न योग्य कुल ७ लाख ८२ हजार २०९ क्रियाशील सदस्यमध्ये हालसम्म ४ लाख ५७ हजार ३६६ जनाले एनसीआईडी प्राप्त गरिसकेका छन्। त्यस्तै, १ लाख २४ हजार ७४८ सदस्यले स्वयं अद्यावधिक फारम पेस गरी सदस्यता नवीकरण प्रक्रियामा सहभागिता जनाएका छन्।
यी दुवै तथ्यांकलाई आधार मान्दा हालसम्म ५ लाख ८२ हजार ११४ सदस्य अद्यावधिक अभियानमा समेटिएका छन्, जुन कुल योग्य सदस्य संख्याको ठूलो हिस्सा हो।
महामन्त्री पौडेलले समयसीमा समाप्त हुनुअघि सदस्यता नवीकरण गर्न बाँकी रहेका सबै क्रियाशील सदस्यलाई तत्काल प्रक्रिया पूरा गर्न आग्रह गरेका छन्। उनले निर्धारित अवधि सकिएपछि थप अवसर उपलब्ध नहुन सक्ने संकेत गर्दै सदस्यता अद्यावधिकलाई प्राथमिकताका साथ सम्पन्न गर्न अपिल गरेका हुन्।
कांग्रेसले आगामी संगठनात्मक गतिविधि तथा महाधिवेशनको तयारीलाई लक्षित गर्दै देशभर सदस्यता अद्यावधिक अभियान सञ्चालन गरिरहेको छ। पार्टीका अनुसार सदस्यताको अभिलेखलाई व्यवस्थित, पारदर्शी तथा प्रविधिमैत्री बनाउन एनसीआईडी आधारित डिजिटल प्रणाली लागू गरिएको हो।
समयसीमा सकिन अब केही घण्टा मात्र बाँकी रहेकाले सदस्यता अद्यावधिक गर्न बाँकी रहेका सदस्यहरूलाई आवश्यक विवरण बुझाई तोकिएको प्रक्रियाअनुसार सदस्यता नवीकरण गर्न पार्टी नेतृत्वले पुनः आग्रह गरेको छ।
तपाईको प्रतिक्रिया दिनुहोस्