विदुर । पत्रकारहरुको छाता संगठन नेपाल पत्रकार महासंघको नयाँ नेतृत्वका लागि असोज ५ गते निर्वाचन गर्ने भनिएपनि सदस्यता विवाद समाधान नहूँदा फेरि स्थगित हुने सम्भावना बढेको छ । सदस्यता विवादका विषयमा आइतबार बसेको केन्द्रीय समितिको बैठकमा सहमति नजुटेपछि महाधिवेशनको सम्भावना टर्दै गएको हो ।
आइतबारको बैठकले सदस्यता विवाद समाधान गर्ने र अन्तिम नामाबली सार्वजनिक गर्ने भनिएको थियो । बैठकमा मतदाताको अन्तिम नामवली सार्वजनिक गर्नुपर्ने अडान केन्द्रीय अध्यक्षले राखे पनि विवाद हल भएपछि मात्रै नामावली सार्वजनिक गर्नुपर्ने अन्य सदस्यहरुले दवाव दिएपछि बैठक विना निश्कर्ष टुंगिएको थियो । नामवली सार्वजनिक गर्न नसकेपछि असोज ५ का लागि तय गरिएको अधिवेशन हुन नसक्ने भन्दै अध्यक्ष पोखरेलले राजीनामा दिएका छन् ।
अध्यक्ष पोखरेलले उपाध्यक्ष रमेश विष्टलाई सम्बोधन गर्दै राजीनामा दिएका छन् । अध्यक्षको राजीनामा भने कार्यसमितिले स्वीकृत गरेको छैन । कार्यसमितिले भने राजीनामा फिर्ता गराएर सहमतिका आधारमा असोज ५ ते नै अधिवेशनको तयारी गरिरहेको कार्यसमितिका एक सदस्यले नुवाकोट पुकारलाई बताए। महासंघले हालसम्म तीन पटक निर्वाचनको मिति तोकिसकिएको छ । महासंघका अध्यक्ष विपुल पोखरेलले आइतबार प्रेस वक्तव्य जारी गर्दै सबै तहको निर्वाचन असोज ५ गते हुने उल्लेख गर्नुभएको थियो । ‘‘सबै तहको निर्वाचन एकैसाथ सम्पन्न गर्न निर्वाचन समितिलाई पत्राचार गरिएको जानकारी गराउँछु । साथै, यो निर्वाचनलाई सफल बनाउन सबैसँग हार्दिक आग्रह पनि गर्छु’, अध्यक्ष पोखरेलद्वारा जारी वक्तव्यमा भनिएको थियो ।
महासंघमा प्रत्यक्ष निर्वाचन प्रणालीमार्फत नेतृत्व चयन गर्ने व्यवस्था गरिएको छ । सो अनुसार सबै तहको निर्वाचन एकै पटक गर्ने महासंघको तयारी रहेको छ । सदस्या शुद्धिकरणका नाममा बारम्बारको विवादले गर्दा पत्रकारहरुको संस्था आफै विवादित बन्दै गएको छ ।
