काठमाडौँ । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले माओवादी घटकहरुलाई एकताको प्रक्रियामा आउन आह्वान गर्नुभएको छ । सहिद प्रतिष्ठान नेपालको १५ औँ वार्षिक साधारणसभालाई पार्टी केन्द्रीय कार्यालय पेरिसडाँडामा सम्बोधन गर्दै अध्यक्ष दाहालले ढिलो नगरी माओवादी शक्तिहरु एकतावद्ध हुनुपर्नेमा जोड दिनुभएको हो ।
दाहालले यसअघि पनि माओवादी पार्टीहरुलाई एकतामा आउन जोड दिँदै आउनु भएको छ । तर सत्तामा रहँदा भने साही शक्तिहरुलाई त्यति चासो दिएको दैखिदैन । “ढिलो नगरी हामी सबै एकताबद्ध होऔँ, हामीले सबै मोर्चा जित्न सक्छौ ।” “सबै माओवादी एक ठाउँमा केन्द्रित भएर अगाडि जानुको विकल्प छैन, सबैको मर्म एउटै छ, त्यसकारण पनि एक ठाउँमा आउनुको विकल्प छैन”, उहाँले भन्नुभयो ।
आफ्नो नेतृत्वको सरकारले ‘जनयुद्ध’ का सहिदलाई राष्ट्रिय सहिदको मान्यता दिएको र जनयुद्ध दिवसलाई राष्ट्रिय दिवसका रुपमा मनाउने निर्णय गरेको स्मरण गराउँदै अध्यक्ष दाहालले आफूले सरकारमा रहँदा जनयुद्धका सहिद, बेपत्ता र घाइतेका पक्षमा दूरगामी निर्णय गरेको उल्लेखपनि उल्लेख गर्नुभयो ।
“हाम्रा हजारौँ सहिद नै हाम्रा शक्ति हुन्, उनीहरूको सपना पूरा गराउन लाग्नु आजको हाम्रो प्रमुख कार्यभार हो, हामी एकीकृत र केन्द्रीकृत हुने बित्तिकै हाम्रो शक्ति थप मजबुत हुन्छ, ढिलो नगरी छिट्टै एकताबद्ध भएर ठाउँमा केन्द्रीकृत होऔँ”, अध्यक्ष दाहालले भन्नुभयो ।
उहाँले ठूलो प्रयासपछि संक्रमणकालीन न्यायसँग सम्बन्धित विधेयक संघीय संसद्मा पारित भई राष्ट्रपतिबाट स्वीकृतसमेत भइसकेको स्पष्ट पार्दै अब आयोग गठनको प्रक्रिया अगाडि बढेको बताउनुभयो । आयोगमा उपयुक्त व्यक्ति छनोटका लागि दबाब दिनु आवश्यक रहेको अध्यक्ष दाहालको भनाइ थियो ।
विस्तृत शान्ति सम्झौता, विगतमा भएका अन्य सहमति तथा सम्झौताका आधारमा पनि माओवादी एउटा पक्ष भएकाले कोही कसैले पनि बाहेक गर्न नसक्ने उहाँको कथन छ । संघीय संसद्मा आफ्नो पार्टीको सिट सङ्ख्या कम भएको भनेर हिनाताबोध नगर्न र कमजोर महशुस नगर्न अध्यक्ष दाहालले सबैलाई आग्रह गर्नुभयो ।
उहाँले प्रतिष्ठान मातहत हाल देशभर पाँच विद्यालय सञ्चालनमा रहेको र त्यसलाई थप विस्तार गर्ने प्रतिबद्धता व्यक्त गर्नुभयो । यस्तै उहाँले प्रतिष्ठान मातहतमा रहेर कृषि, उद्योग तथा अन्य उत्पादनमूलक काम गर्नेतर्फ पनि आवश्यक पहल गर्न आग्रह गर्नुभयो ।
माओवादी घटकबिचको साझा संस्थाका रुपमा रहेको प्रतिष्ठानलाई थप विस्तार गरेर जनताको पक्षमा काम गर्ने वातावरण बनाउनुपर्ने अध्यक्ष दाहालको जोड थियो । कार्यक्रममा नेकपाका नेता एवम् वरिष्ठ अधिवक्ता एकराज भण्डारीलगायतले सहिदको सपना साकार पार्न इमान्दार प्रयासको जरुरी रहेको बताउनुभयो ।
