काठमाडौँ । नुवाकोट जिल्लाको ककनी गाउँपालिका वडा नं २ मा हुने उपनिर्वाचनका लागि दुई सत्ताधारी दल नेपाली कांग्रेस र एमालेले आफ्ना उम्मेदवार चयन गरेका छन् ।
नेपाली कांग्रेसले उक्त वडाका पार्टी उपसभापति सुर्यबहादुर तामाड.लाई उम्मेदवार बनाएको छ भने नेकपा एमालेले सोही वडाका पार्टी सचिव यमबहादुर तामाड.लाई उम्मेदवार बनाएको छ ।
कांग्रेस ककनीका युवा नेता तथा वडा नं ३ का सभपाति श्रीहरि ढकालले दिनुभएको जानकारी अनुसार सुर्यतामाड.लाई उम्मेदवार बनाएसँगै कांग्रेस एक ढिक्का भएर निर्वाचनमा होमिएको छ । पार्टीमा सक्रिय रहेका तामाड.लाई कांग्रेसले सर्वसम्वत रुपमा उम्मेदवार बनाएको ढकालले जानकारी दिनुभयो ।
यस्तै नेकपा एमालेले पनि यमबहादुरलाई सर्वसम्वत रुपमा उम्मेदवार बनाएको जिल्ला अध्यक्ष बद्री मैनालीले नुवाकोट पुकारलाई जानकारी दिनुभयो ।
यसअघि माओवादीको पालिका समितिको बैठकले कृष्ण घिमिरे मिलनको नाम सर्वसम्मतरुपमा अनुमोदन गरिसकेको छ । उम्मेदवार चयनसँगै दलहरु निर्वाचनमा होमिका छन् ।
सत्ता गठबन्धनमा सहकार्य गरेपनि दुवै दलले आआफ्नो ढंगले निर्वाचन लड्ने तयारी गरेका छन् । कांग्रेस जिल्ला सभापति रमेश महतले भन्नुभयो, वडामा गठबन्धन गर्ने हाम्रो निती छैन मित्रवत रुपमा प्रतिस्पर्धा हुनेछ ।
निर्वाचन आयोगको कार्यतालिका अनुसार दलहरुले मंसिर २ गते उम्मेदवारको मनोनयन गर्नेछन् । यस अघि कांग्रेसबाट निर्वाचित भएका वडा अध्यक्षको निधन भएपछि उक्त वडामा उपनिर्वाचन हुन लागेको हो । नुवाकोट जिल्लामा सोही वडामा मात्रै निर्वाचन हुँदैछ । देशभर ४४ स्थानीय तहमा मंसिर १६ गते निर्वाचन हुँदैछ ।
