पोखरा । राष्ट्रिय स्वतन्त्र पार्टीका सभापति एवं पूर्व उपप्रधान तथा गृहमन्त्री रवि लामिछानेलाई पुनः १५ दिनको म्याद थप गरिएको छ ।
कास्की जिल्ला अदालतले पुनः १५ दिन थुनामा राख्न प्रहरीलाई अनुमति दिएको जिल्ला अदालत कास्कीका सूचना अधिकारी सुरज अधिकारीले जानकारी दिनुभयो ।
सहकारी ठगी प्रकरणमा गत कार्तिक २ गते पक्राउ पर्नुभएको सभापति लामिछानेलाई जिल्ला अदालत कास्कीका न्यायाधीश हिमलाल वेलवासीको इजलासले लामिछानेमाथि थप १५ दिन थुनामा राखेर अनुसन्धान गर्न आदेश दिएको हो ।
पहिलो पटक ६ दिन म्याद दिएको अदालतले दोस्रो पटक ७ दिन र तेस्रो पटक १० दिनको म्याद दिएको थियो भने चौथो पटक १३ दिनको म्याथ थप गरेको थियो ।
लामिछानेमाथि सहकारी ठगीसँगै सङ्गठित अपराध र सम्पत्ति शुद्धीकरणमा समेत अनुसन्धान भइरहेको प्रहरीले जनाएको छ ।
लामिछानेविरुद्ध रुपन्देहीमा पनि पक्राउ पुर्जी जारी भएसँगै लामिछाने हवाई मार्ग हुँदै रुपन्देहीमा समेत लगेर अनुसन्धान गरिएको प्रहरीले जनाएको छ । पोखराको सूर्यदर्शन सहकारीको रकम काठमाडौँको गोर्खा मिडिया प्रालिमा प्रयोग गरेर अपचलन गरेको सभापति लामिछानेमाथि आरोप छ ।
पोखराको सूर्यदर्शन सहकारीको रकम गोर्खा मिडियाबाट अपचलन गरेको भन्दै पूर्वप्रबन्ध निर्देशक लामिछानेसहित पूर्व डिआइजी छविलाल जोशीलाई समेत अदालतमा उपस्थित गराइएको थियो ।
यसैबीच, रास्वपाले आइतबार पोखराको मानव अधिकार चोकमा धर्ना दिएको छ । आफ्ना सभापतिलाई राजनीतिक प्रतिशोधका आधारमा पक्राउ गरेर म्याद थप गर्दै हिरासतमा राखेको रास्वपाको आरोप छ ।
आइतबार पनि पोखराको सुरक्षा व्यवस्था कडा पारिएको थियो । जिल्ला अदालत देखि शहिदचोक लगायतको क्षेत्रमा हाल निषेधाज्ञा जारी गरिएको छ ।
