विदुर खेलकुद महोत्सवको तयारी अन्तिम चरणमा

नुवाकोट । नुवाकोट जिल्लाके पिपलटारमा आयोजान हुने विदुर खेलकुद महोत्सवको तयारी अन्तिम चरणमा पुगेको छ ।

पिपलटार फुटबल क्लवको आयोजना तथा जालपा मिडिया सर्भिस र एभरेष्ट ईभेन्ट म्यानेजमेन्टको व्यवस्थापनमा विदुर नगरपालिका वडा नम्बर ५ मा आगामी माघ २७ गतेदेखि हुन लागेको बिदुर खेलकुद तथा पर्यटन महोत्सवको तयारी अन्तिम चरणमा पुगेको आयोजकहरुले जनाएका छन् ।

महोत्सवमा प्रतियोगितात्मक खेल गतिबिधिहरु, प्रतियोगितात्मक लोक नृत्य , स्थानीय उत्पादनहरुको प्रदर्शनी, लोपोन्मुख रीतिरिवाज र संस्कृति झल्कने झाँकीहरुको प्रदर्शनी, चर्चित कलाकारहरुको सांगितिक प्रस्तुतिका साथै मनोरञ्जनात्मक खेल मेलाहरु समेटिएको आयोजक क्लवका अध्यक्ष उद्धब पनेरुले जानकारी नुवाकोट पुकारलाई जानकारी दिनुभयो ।

११ दिनसम्म चल्ने महोत्सव ५०देखि हजारले अवलोकन गर्ने र महोत्सव अवधिभर दुईकरोड भन्दा बढीको कारोबार हुने अपेक्षा गरिएको महोत्सवक व्यवस्थापनको जिम्म लिएको जालपा मिडिया सर्भिसका सञ्चालक शिव देवकोटाले जानकारी दिनुभयो । देवकोटाका अनुसार महोत्सवको लागि अहिले जिल्लाको विभिन्न स्थानमा गेट बनाउने काम र महोत्सवस्थलमा स्टल बनाउने काम अन्तिम चरणमा पुगिसेको छ ।

नुवाकोट जिल्लामा नुवाकोट उद्योग बाणिज्य संघले आयोजना गरेको महोत्सवपछि यो अर्को ठुलो महोत्सव हो । महोत्सवको लागि विदुर नगरपालिका वडा नम्वर ५ का वडा अध्यक्ष लिलानाथ न्यौपानेको संयोजकत्वमा एकसय ५० सदस्यीय मूल आयोजक समिति गठन गरिएको छ ।

जिल्लाका कतिपय स्थानमा महोत्सव आयोजना हुने गरेपनि सोचेजस्तो नहुँदा आयोजकहरु नै भाग्नु पर्ने अवस्था विगतमा देखिदै आएको छ । तर विदुर महोत्सवलाई भने जिल्लाभरका सबै उद्योगी व्यवसायी तथा स्थानीय पालिकाहरुको सहयोग रहेको भन्दै आयोजकहरुले यसलाई हालसम्मकै उत्कृष्ट बनाउने दावी गरेका छन् ।