नुवाकोट । नेकपा (एमाले) का वरिष्ठ उपाध्यक्ष ईश्वर पोखरेलले अहिलेको समीकरणमा नेपाली कांग्रेस र नेकपा एमाले कटिबद्ध रहेको बताउनु भएको छ । शनिबार नुवाकोट आउनुभएका उपाध्यक्ष पोखरेलले प्रेस चौतारी नुवाकोटले आयोजना गरेको पत्रकार भेटघाट कार्यक्रममा बोल्दै यस्तो बताउनु भएको हो ।
उहाँले विगतमा भएको सात बुँदै सहमतिप्रति कांग्रेस एमाले इमान्दार भएसम्म कसैले धारे हात लगाउँदै सरकार नढल्ने दावी समेत गर्नुभयो । उहाँले भन्नुुभयो ‘सरकारको आयु नेकपा एमाले र नेपाली कांग्रेसले इमान राखुञ्जेल टिक्छ। इमान रहुञ्जेल कसैले धारे हात राखेर भत्काउन सक्दैन । अहिलेको समीकरणमा नेपाली कांग्रेस र नेकपा एमाले कटिबद्ध छ ।’ उपाध्यक्ष पोखरेलले अध्यादेश पारित हुनेमा ढुक्क हुन आग्रह समेत गर्नुभयो ।
पोखरेलले जनताका जल्दाबल्दा समस्याको तत्काल समाधान गर्न सरकारले अध्यादेश ल्याएको उल्लेख गर्नुभयो । ‘प्रतिनिधिसभामा त केहि समस्या भएन । समस्या राष्ट्रियसभामा हो । त्यो छलफलमै रहेको छ । कुरै भएन’, उहाँले भन्नभयो ।
पत्रकार भेटघाट कार्यक्रममा एमाले बागमती प्रदेशका इन्चार्ज डा. राजन भट्टराई, नेकपा एमाले नुवाकोटका अध्यक्ष बद्री मैनालीसहितका नेताहरुको समेत सहभागिता रहेको थियो ।
