काठमाडौं । धितोपत्र दोस्रो बजार मापक नेप्से परिसूचक साताको अन्तिम कारोबार दिनको कारोबारमा झिनो अंकले बढेर बन्द भएको छ । नेप्से ३.१४ अंकले बढेर २७४३.७४ विन्दुमा बन्द भएको हो ।
यस दिन नेप्से झिनो अंकले बढेपछि कारोबार रकममा कमी आएको छ । आठ अर्ब ६२ करोड ७६ लाख रुपैयाँको सेयर किनबेच भएको छ । गएको मंगलबार १० अर्ब ४३ करोड ७० लाख रुपैयाँको सेयर खरिद–बिक्री भएको थियो ।
बिहीबार ८१ कम्पनीको सेयर मूल्य बढेको छ । १५८ कम्पनीको सेयर मूल्य घटेको छ । पाँच कम्पनीको सेयर मूल्य स्थिर रहेको नेपाल स्टक एक्सचेन्ज (नेप्से)ले जनाएको छ ।
गार्डेन माइक्रोलाइफ इन्स्योरेन्सको सेयर मूल्य ९।९९ प्रतिशतले बढेर प्रतिकित्ता ७०९ रुपैयाँ ३० पैसा कायम भएको छ । विन नेपाल लघुवित्त वित्तीय संस्थाको सेयर मूल्य ९।६९ प्रतिशतले बढेर प्रतिकित्ता तीन हजार ९५० रुपैयाँ कायम छ
बाराही हाइड्रोपावरको सेयर मूल्य ८।३५ प्रतिशतले घटेर प्रतिकित्ता एक हजार १४१ रुपैयाँ कायम भएको छ ।
कारोबारमा आएका १३ मध्ये जीवन बिमा, निर्जीवन बिमा, ‘अन्य’ र व्यापार समूहको परिसूचक बढेको छ । व्यापार समूहको परिसूचक सर्वाधिक ३।७७ प्रतिशतले वृद्धि भएको छ ।
