
शिक्षा विकास समन्वय ईकाइका प्रमुखलाई ध्यानाकर्षणपत्र बुझाएपछि सामूहिक तस्बिर खिचाउँदै शिक्षक महासंघका प्रतिनिधिहरु ,तस्बिर, नमराज नेपाल
काठमाडौं । नेपाल शिक्षक महासंघले घोषणा गरेको आन्दोलनका कार्यक्रम अनुसार आज शिक्षा विकास तथा समन्वय इकाईका प्रमुखलाई ध्यानाकर्षणपत्र बुझाएको छ । महासंघ केन्द्रीय समितिको आह्वानमा आज ७७ वटै जिल्लामा शिक्षा विकास समन्वय इकाईमा पुगेर ज्ञापनपत्र बुझाइएको जनाइएको छ ।
सोही आन्दोलनका कार्यक्रम अनुसार नुवाकोट जिल्लामा पनि महासंघका प्रतिनिधिहरुले शिक्षा विकास समन्वय इकाई प्रमुख कुमार बस्नेतलाई ज्ञापनपत्र बुझाएका छन् । उनीहरुले विगतमा भएको सहमति अनुसार संसदबाट शिक्षा विधेयक तत्काल पारित हुनुपर्ने लगायतका माग कार्यान्वय हुनुपर्नेमा जोड दिएका छन् । माघ २० गते बसेको तेस्रो पूर्ण राष्ट्रिय बैठकपछि आन्दोलनको घोषणा गरिएको थियो ।
आन्दोलनका कार्यक्रम अनुसार फागुन १५ गते आआफ्नो प्रदेशमार्फत मुख्यमन्त्री तथा समाजिक विकास मन्त्रीसमक्ष ध्यानाकर्षणपत्र बुझाउने कार्यक्रम रहेको छ । फागुन २४ गते राजधानीमा बृहत जुलुश प्रदर्शनसहित खबरदारीसभाको आयोजना गरिने छ । २६ गते दोस्रो चरणको आन्दोलनका कार्यक्रम घोषणा गर्ने बताइएको छ ।
महासंघले यसअघि सामाजिक सञ्जालमार्फत समेत शिक्षा विधेयक तत्काल कालगू गर्न माग गर्दै पोष्ट गरिसकेका छन् भने आन्दोलनका कार्यक्रमबारे सरोकारवाला पक्षसँग छलफल गरिसेकेका छन् । सरकारले यसै हिउँदे अधिवेशनबाट शिक्षा विधेयक पारित गर्ने बताएपनि व्यवस्थापिका संसदमा छलफलका लागि दर्ता भएको छैन । जसले शिक्षकहरुमा शंका पैदा भएको छ ।
