काठमाडौं, चैत २२ . नेपाल वित्तीय संस्था कर्मचारी संघले आफ्नो ३५औं स्थापना दिवसका अवसरमा शुक्रबार काठमाडौंमा प्रभातफेरि कार्यक्रम सम्पन्न गरेको छ । राजधानीको भृकुटीमण्डपमा सम्पन्न प्रभातफेरि कार्यक्रममा पूर्वअर्थमन्त्री तथा नेपाली कांग्रेसका प्रवक्ता डा. प्रकाशशरण महत प्रमुख अतिथि थिए ।
संघका अध्यक्ष पदमराज रेग्मीको सभापतित्वमा सम्पन्न कार्यक्रममा प्रतिनिधिसभा सदस्य संजय गौतम विशिष्ट अतिथिको रुपमा सहभागी थिए । कार्यक्रममा नेपाल ट्रेड युनियन कांग्रेसका अध्यक्ष योगेन्द्रकुमार कुँवर र पूर्वअध्यक्ष लक्ष्मणबहादुर बस्नेत विशेष अतिथिको रुपमा सहभागी थिए ।
कार्यक्रममा प्रमुख अतिथि र अन्य अतिथिले शुभकामना मन्तव्य राखेका थिए ।
संघले श्रमको सम्मान, बैंक तथा वित्तीय संस्था÷कर्मचारीमाथिको आक्रमण रोक्न र समस्त वित्तीय क्षेत्रमा पूर्ण सुरक्षाको ग्यारेन्टी गर्न माग गरेको छ । त्यसैगरी संगठित हुने, सामूहिक सौदाबाजी गर्ने श्रमिकको मौलिक अधिकार सुनिश्चित गर्न र काम गर्ने समय÷विश्राम÷सुरक्षासम्बन्धी श्रम ऐनको व्यवस्था कार्यान्वयन गर्न पनि आग्रह गरेको छ ।
आयकर छुटको सीमा वृद्धि गर्नुपर्नेमा जोड दिएको संघले वित्तीय क्षेत्रलाई शान्ति क्षेत्र घोषणा गर्न र सामाजिक सुरक्षामा लगाइने दोहोरो कर खारेज गर्न भनेको छ ।
नीति निर्माणमा श्रमिकको प्रतिनिधित्व सुनिश्चित गर्न, राजनीतिक हस्तक्षेप बन्द गर्न र श्रम ऐन कानूनको पूर्ण कार्यान्वयन गर्न पनि संघले माग गरेको छ । अन्तर्राष्ट्रिय श्रम संगठन (आइएओ) अभिसन्धी नम्बर ८७ अनुमोदन गर्न माग गरेको संघले सुमधुर औद्योगिक वातावरण निर्माण र बढ्दो महँगी नियन्त्रण गर्नुपर्नेमा जोड दिएको छ ।
