नुवाकोट पुकार
काठमाडौँ । नेपाली कांग्रेस सुदूरपश्चिम प्रदेश कार्यसमितिले विशेष महाधिवेशनबाट आएको केन्द्रीय नेतृत्व जनअपेक्षा अनुसार काम गर्न नसकेको निष्कर्ष निकालेको छ । धनगढीमा सम्पन्न प्रदेशस्तरीय भेलाले पार्टीभित्र बढ्दो आन्तरिक कलह, गुटबन्दी तथा वर्तमान सरकारको कार्यशैलीप्रति गम्भीर असन्तुष्टि जनाउँदै ११ बुँदे घोषणापत्र सार्वजनिक गरेको हो ।
प्रदेश सभापति वीरबहादुर बलायर ले जारी गरेको विज्ञप्तिमा विशेष महाधिवेशनले पार्टीभित्र विभाजनको रेखा कोरेको र त्यसको असर हालै सम्पन्न निर्वाचनमा समेत परेको उल्लेख गरिएको छ । भेलाले आगामी १५ औँ महाधिवेशन निष्पक्ष र धाँधलीरहित बनाउन साविक र वर्तमान केन्द्रीय समितिको समन्वयमा ‘तटस्थ निर्वाचन समिति’ गठन गर्न माग गरेको छ ।
विशेष महाधिवेशनले १४ औँ महाधिवेशनबाट निर्वाचित प्रतिनिधिहरूलाई विस्थापित गरेको भन्दै असन्तुष्टि जनाइएको विज्ञप्तिमा उल्लेख छ । साथै, निवर्तमान सभापति शेरबहादुर देउवा माथि विगतमा लगाइएका आरोप–प्रत्यारोपबारे समीक्षा गर्नुपर्ने माग गरिएको छ । देउवालाई ‘साहसी नेतृत्व’ र ‘अथक योद्धा’को संज्ञा दिँदै भेलाले उपचाररत देउवाको शीघ्र स्वास्थ्य लाभको कामना पनि गरेको छ ।
भेलाले वर्तमान सरकार अपारदर्शी भएको, संसद्प्रति उत्तरदायी नरहेको तथा अध्यादेशमार्फत शासन चलाउन खोजेको आरोप लगाएको छ । धान रोपाइँको समयमा मल अभाव र पेट्रोलियम पदार्थको मूल्यवृद्धिले नागरिक मारमा परेको भन्दै सरकारको ध्यानाकर्षण गराइएको छ । गुरुयोजना बिना सुकुमबासी हटाउने कार्य अमानवीय भएको निष्कर्ष पनि भेलाले निकालेको छ ।
क्रियाशील सदस्यता अद्यावधिकका नाममा शुल्क र प्रक्रियामा अल्झिनुभन्दा संगठन सुदृढीकरणमा ध्यान दिन नेतृत्वलाई सुझाव दिइएको छ । विधानलाई आमूल परिवर्तन गर्ने प्रयासप्रति असहमति जनाउँदै विधान संशोधन न्यायसम्मत र वैधानिक प्रक्रियाअनुसार हुनुपर्नेमा जोड दिइएको छ ।
कांग्रेसले सदनमा प्रभावकारी प्रतिपक्षको भूमिका निर्वाह गर्न नसकेको जनधारणा बढिरहेको उल्लेख गर्दै बेरोजगारी, भ्रष्टाचार र आर्थिक संकटजस्ता जनसरोकारका विषयमा स्पष्ट दृष्टिकोणसहित अघि बढ्न केन्द्रीय नेतृत्वलाई आग्रह गरेको छ ।
भेलाले रानीसैन क्षेत्रलाई सामरिक तथा पर्यटकीय महत्वको क्षेत्रका रूपमा विकास गर्न και राज्यको उपस्थिति सुनिश्चित गर्न सरकारसँग माग गरेको छ । साथै, निर्वाचित पदाधिकारीहरूलाई विधानविपरीत पदबाट हटाउने कार्य स्वीकार्य नहुने चेतावनी पनि दिएको छ ।
सुदूरपश्चिमका ९ वटै जिल्लाबाट सहभागी नेता–कार्यकर्ताले पार्टीलाई एकताबद्ध र जनआधारित बनाउन नेतृत्वमा लचकता, सहनशीलता र त्याग आवश्यक रहेको निष्कर्ष निकालेका छन् ।
तपाईको प्रतिक्रिया दिनुहोस्