काठमाडौं। निर्वाचन आयोगले रिक्त स्थानमा आगामी २०८१ साल मंसिर ६ गते उपनिर्वाचन गर्न नेपाल सरकारलाई सुझाव दिएको छ ।
गत २०७९ सालमा सम्पन्न भएको स्थानीय तहको निर्वाचन पश्चात् देशभरबाट विभिन्न कारणले स्थानीय तहमा रिक्त भएका पदहरुका लागि उपनिार्वचन गर्ने मितिसहित आयोगले सरकारलाई सुझाव दिएको हो । आयोगका अनुसार हाल जिल्ला समन्वय समितिका प्रमुख २, गाउँपालिका अध्यक्ष २, उपाध्यक्ष ३ र वडा अध्यक्ष ९ तथा नगरपालिका प्रमुख १, उपप्रमुख १ र वडा अध्यक्ष २१ गरी जम्मा ३९ स्थान रिक्त रहेका छन् । उक्त स्थानमा २०८१ मंसिर १६ गते आइतबार उपनिर्वाचन सम्पन्न गर्नेगरी मिति तोक्न नेपाल सरकारलाई परामर्श दिइएको आयोगले जारी विज्ञप्तिमा भनेको छ,
नेपालको संविधान तथा स्थानीय तह निर्वाचन ऐन, २०७३ बमोजिम जिल्ला समन्वय समितिका प्रमुख, उपप्रमुख तथा गाउँपालिकाका अध्यक्ष, उपाध्यक्ष, वडा अध्यक्ष र नगरपालिकाका प्रमुख, उपप्रमुख, वडा अध्यक्षको पदावधि समाप्त नहुँदै निजको पद कुनै कारणले रिक्त भएमा र एक वर्षभन्दा बढी पदावधि बाँकी रहेको अवस्थामा बाँकी अवधिका लागि रिक्त पदको पूर्ति उपनिर्वाचनद्वारा हुनेछ भन्ने संवैधानिक व्यवस्था अनुसार आयोग निर्वाचनको तयारीमा जुटेको छ ।
उपनिर्वाचन हुने मिति निर्वाचन आयोगको परामर्शमा नेपाल सरकारले तोक्नेछ भन्ने व्यवस्था भए बमोजिम परामर्श दिइएको हो आयोगले जारी गरेको विज्ञप्तिमा जनाइएको छ । साथै आयोगले निर्वाचन आयोगले मतदाता नामावली ऐन, २०७३ को दफा २० को उपदफा (२) बमोजिम उपनिर्वाचन प्रयोजनका लागि निर्वाचन आयोगबाट अन्तिम मतदाता नामावली स्वीकृत गरी प्रकाशन गरेको मितिसम्ममा कुनै जिल्ला समन्वय समितिको प्रमुख, उपप्रमुख तथा गाउँपालिकाका अध्यक्ष, उपाध्यक्ष, वडा अध्यक्ष र नगरपालिका प्रमुख, उपप्रमुख, वडा अध्यक्षको पद कुनै कारणले रिक्त भएमा संवत् २०८१ मंसिर १६ गते नै उपनिर्वाचन गर्ने गरी परामर्श समेत दिएको आयोगले आज जारी गरेको विज्ञप्तिमा जनाइएको छ ।
