काठमाडौँ । सरकारको न्यूनतम साझा कार्यक्रम तयार गर्न गठित कार्यदलले सरकारलाई प्रतिवेदन बुझाएको छ ।कार्यदलका सदस्यहरु नेपाली कांग्रेसका महामन्त्री गगन थापा र एमालेका सचिव प्रदिप ज्ञवालीले प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवालाई बुझाउनु भएको थियो । कार्यदलले झण्डै डेड महिना लगाएर प्रतिवेदन तयार पारेको थियो ।
सो अवसरमा कार्यदल सदस्य नेपाली कांग्रेस प्रवक्ता डा. प्रकाशशरण महत,प्रधानमन्त्रीका राजनीतिक सल्लाहकार विष्णु रिमालको पनि उपस्थिति रहेको थियो । प्रधानमन्त्री तथा मन्त्रिपरिषद्को कार्यालयमा प्रतिवेदन बुझाएपछि कार्यदलका सदस्य एवं नेपाली काँग्रेसका महामन्त्री गगनकुमार थापाले जनतामा आशा जगाउने खालका कार्यक्रम तथा योजनाहरूलाई साझा कार्यक्रममा समेटिएको बताउनुभयो । उहाँले युवालाई रोजगारी सिर्जना गर्ने मुलुकमा सुशासन कायम गर्ने सरकारको मुख्य लक्ष्य हुने गरि कार्यदलले साझा कार्यक्रमा समावेश गरेको पनि जानकारी दिनुभयो ।
महामन्त्री थापाले जनतामा केही भएन भन्ने किसिमको भ्रमपूर्ण प्रचारबाजी सत्य नभएकाले सरकारका सत्ता साझेदार दलहरू त्यसप्रति सचेत रहेको र त्यसै अनुरुप न्यूनतम साझा कार्यक्रम ल्याइएकाले आगामी दिनमा राम्रो प्रतिफल प्राप्त हुने विश्वास व्यक्त गर्नुभयो ।
काँग्रेस महामन्त्री थापाले भ्रष्टाचारजन्य चर्चित काण्डहरूका बारेमा सरकारले गर्ने छानबिनमा कुनै मुलाहिजा नगरिने पनि बताउनुभयो । एमाले सचिव प्रदिप ज्ञवालीले पनि साझा कार्यक्रममा आम नागरिकलाई राहत हुने खालका कार्यक्रमकासाथ सुशासन कायम गर्न गरि प्रतिवेदन तयार पारिएको जानकारी दिनुभयो । नेपाली कांग्रेस र एमाले बीचको गठबन्धनले आगमी २०८४ सम्म आलोपालो सरकारको नेतृत्व गर्ने र मुलुकलाई स्थायित्व दिने भन्दै साझा कार्यक्रम तयार पारेको हुन ।
साझा कार्यक्रममा संविधान संशोधनको कुरा पनि उठायएको छ । राजनीतिक सहमतिका आधारमा संविधान संशोधन गरिने कुरालाई जोड दिइएको नेताहरुले बताएका छन् । उक्त प्रतिवेदनसहितको कार्यक्रम शीर्ष तहमा अध्ययनपछि औपचापरिक रुपमा सार्वजनिक गरिने बताइएको छ । स्रोतका अनुसार आज संविधान दिवसका अवसरमा सार्वजनिक गरिने बताइएको छ।
