नजिकिदो चाडवाड र सडक सुरक्षा

अकल्पनीय प्राकृतिक विपत्तिको सामना गरेसँगै नेपालीहरुका महत्वपूर्ण चाडवाडहरु नजिकिएका छन् । भोलिबाट बडादशैं सुरु हुँदैछ । भोलि घर घरमा जमरा राखे सँगे बडा दशैं सुरु हुन्छ । दशैंका लागि आआफ्नो घर जाने क्रम सुरु हुन लागेको छ । सरकारी तथ्यांक अनुसार यस वर्ष झण्डै १८ लाख नागरिकले राजधानी काठमाडौं छाड्ने अनुमान गरिएको छ । यस्तै अन्य विभिन्न शहरबाट पनि आआफ्नो जन्मथलो आउने संख्या त्यतिकै हुने गर्दछ । दशैंमा आफ्नो परिवारसँग भेट्ने, दशैं मनाउने, टिका लगाएर आशिर्वाद ग्रहण गर्ने भएकाले अधिकांश मानिसहरु दशैंमा आफ्नो परिवारसँग जम्मा हुन चाहान्छन् । जसले गर्दा सडक यातायात क्षेत्रमा बढि चहल पहल हुने गर्दछ ।

भौतिक पूर्वाधार तथा यातायात मन्त्रालयले सडक विभागअन्तर्गतका सडकलाई घटस्थापना अगाडि मर्मत सम्भार गर्न असोजको पहिलो साता निर्देशन दिएको थियो । दसैँ, तिहार र छठ पर्वमा यात्रुलाई सहज रुपमा गन्तव्यस्थलसम्म पुग्नका लागि मन्त्रालयका सरकारी प्रतिनिधि र यातायात व्यवसायीबिच बसेको बैठकले सो निर्देशन गरेको हो । तर सडक मर्मत सम्भावका काम हुँदै गर्दा असोज ११देखि १३ सम्मको अविरल वर्षाका कारण बाढी र पहिरोले ठुलो क्षति हुन पुगेको छ । जल तथा मौसम विज्ञान अनुसन्धान विभागका अनुसार मनसुन सकिन अझै केही दिन लाग्ने अनुमान गरिएको छ । यसले सडक सुरक्षामा थप अन्योलता सिर्जना भएको छ । यातायात व्यवसायीले दशैंका लागि यातायातहरु थप गरेर सञ्चालनको तयारी समेत गरिससकेका छन् । यात्रुहरुले अग्रिम टिकट काटेर घरजाने तरखर गरिसकेका छन् ।

वर्षभरिको महत्वपूर्ण र ठुलो चाड भएकाले सबैले सहज रुपमा दशैं मनाउन आआफ्नो स्थानमा जान पाउनु पर्दछ र त्यसका लागि राज्यले सहजिकरण गरिदिनुपर्दछ । सरकारका तर्फबाट आवश्यक सहजिकरण भएको छ । तर प्राकृतिक रुपमा केही असहजता उत्पन्न हुन थालेको छ । यो बेलामा हामी सबैले सचेत हुनुपर्ने अवस्था आएको छ । लामो तथा छोटो दुरीका सवारी साधान सञ्चालन गर्दा पनि सिटभन्दा बढि यात्रु बोक्ने,छतमा समेत चढाउने, प्रतिस्पर्धा गर्ने, गर्दा चाडवाडमा धेरै दुर्घटना हुने गर्दछन् । कमसेकम हामीले ठुलो विपत्ति पार गरेर भर्खरमात्रै आएका छौं ।

यो अवस्थामा चालककदेखि यात्रुहरु, प्रहरी, नागरिक समाज सबैले आआफ्नो तर्फबाट सचेतना अपनाउन आवश्यक छ । सडकको अवस्थालाई ध्यान दिएर सवारी सचाउन सक्यौं भने खतराबाट जोगिन सक्छौं । हामी जति सचेत हुन सक्यौं त्यति दुर्घटनाबाट बच्न सकिन्छ । यसर्र्थ सचेत बनौं र अरुलाई पनि सचेतना प्रदान गरौं । तबमात्रै सबैले सहज र खुशीका साथ दशैं मनाउन सकिन्छ । बडा दशैंको सबैमा शुभकामना