२२ असोज, काठमाडौँ । काठमाडौँ उपत्यकामा आजदेखि मेलम्चीको पानी वितरण गरिएको छ। खानेपानीमन्त्री प्रदीप यादवले मंगलबार काठमाडौँको सुन्दरीजलमा रहेको मेलम्चीको पानी प्रशोधन केन्द्रबाट उपत्यकाका घरहरुमा पानी वितरण कार्यक्रम सुरूवात गर्नुभएको थियो ।
सुन्दरीजलमा रहेको पानी प्रशोधन केन्द्रबाट मेलम्चीको पानी खोलिएपछि काठमाडौँ उपत्यका खानेपानी लिमिटेड (केयुकेएल) का विभिन्न वितरण शाखामा पानी पठाइएको र ती शाखाहरुबाट वितरण सुरु हुने मेलम्ची खानेपानी विकास समितिका कार्यकारी निर्देशक रत्नप्रसाद लामिछानेले सो अवसरमा जानकारी दिनुभएको छ ।
मेलम्ची संघर्ष समिति र सरकारबीच सोमबार राति अबेरसम्म पानी पठाउने विषयमा बसेको वार्ता सफल भएपछि सुन्दरीजलमा पानी पथान्तरण गरेर वितरण थालिएको केयुकेलले जनाएको छ । यसअघि असार २० गतेबाट मेलम्चीको पानी बन्द गरिएको थियो । सरकारले असोज १० गतेबाट पानी वितरण गर्ने भनेको भएपनि असोज ११ र १२ गतेको वर्षातका कारण थप समसया उत्पन्न भएको थियो । अब भने नियमित रुपमा पानी आउने आयोजनाका कार्यकारी निर्देशक लामिछानेले बताउनुभयो ।
