काठमाडौँ — प्रधानमन्त्री केपी शर्मा ओलीले एमाले र कांग्रेस गठबन्धनको सरकार लगभग दुई भएको भएको भन्दै परिवर्तनको कुरामा कुनै सत्यता नरहेको स्पष्ट पार्नुभएको छ । दसैंपछि सरकार परिवर्तन हुन्छ भन्ने कुरा चलेको भन्दै प्रधानमन्त्री ओलीले त्यस्ता कुरा भ्रम भएको र ती भ्रमहरूमा नपर्न आग्रह गर्नुभएको छ ।
६९ औं प्रहरी दिवसको अवसरमा बुधबार आयोजित कार्यक्रममा प्रधानमन्त्री ओलीले सरकार परिवर्तनको भ्रम नछर्न र त्यस्ता भ्रममा नपर्न आग्रह गर्नुभएको हो । विभिन्न प्रकारका कुनाकाच्पाबाट पनि आवाज आउने गरेका छन् । म स्पष्ट भन्न चाहन्छु–अहिलेको संविधान जनतामा सार्वभौमसत्ता रहेको, जनता शक्तिको स्रोत भएको संविधान र संविधानले निर्दिष्ट गरेको अहिलेको प्रणाली यसको रक्षा गर्दै अघि बढ्नुपर्दछ । धेरै कुरामा कम्प्रोमाइज (सम्झौता) हुन सक्दछ । तर प्रणालीको कुरामा हुन सक्दैन । लोकतन्त्रको कुरामा कम्प्रोमाइज हुन सक्दैन, प्रधानमन्त्रीले भन्नुभयो,लोकतान्त्रिक प्रणालीमार्फत जुनसुकै परिवर्तन पनि ल्याउन सकिन्छ । चुनाव गरौँ, चुनावमा जाऔँ, एउटा सरकार मन परेन भने जनताले अर्को सरकार गठन गर्न पाउँछन्, चुनावका माध्यामबाट ।
उहाँले भन्नुभयो,अहिले दिनैपिच्छे सरकार परिवर्तन हुन्छ भन्नेकुरा पनि सुनिन्छ, दसैंपछि तुरुन्त परिवर्तन हुन्छ रे ? कुन दसैंपछि ? २०८४ सालको दसैंपछिको चुनावमा ? त्यसभन्दा पहिला मैले पहिले नै भनिसकेको छु– मैले एक वर्ष नौ महिना जति रह्यो होला । त्यसपछि शेरबहादुरजीलाई हस्तातरण गर्छु भनेर मैले पहिला नै भनिसकेको छु । त्यसपछि आफै फेरिन्छ सरकार । त्यसपछि शेरबहादुरजीले नेतृत्व गर्नुहुन्छ । र, चुनाव उहाँको नेतृत्वमा हुन्छ २०८४ सालमा, हामीले जे सहमति गरेका छौं , त्यहि अनुसार मुलुक अगाडि बढ्छ ।
उहाँले २०८४ सालमा निर्वाचन कांग्रेस सभापति शेरबहादुर देउवाको नेतृत्वमा हुने र त्यसपछि जसले जितेर आउँछ त्यसले सरकार गठन गर्ने पनि प्रष्ट पार्नुभयो । प्रधानमन्त्रीले भन्नुभयो, यो सरकार लगभग दुई तिहाइको छ भन्ने कुरा सबैमा हेक्का रहोस् । यो खरानीको डल्लो होइन, एमाले र कांग्रेस जसको इतिहास, यो देशको विकास गर्ने कुरामा छ, परिवर्तन गर्ने कुरामा छ । त्यस्ता पार्टीहरूको सरकार हो यो ।’
