काठमाडौँ । सरकारले स्वास्थ्य क्षेत्रमा देखिएको विभिन्न विसंगतिलाई अन्त्य गर्दै व्यवस्थित बनाउन लागेको छ । स्वास्थ्य मन्त्रालयमा नेपाली कांग्रेसका युवा नेता प्रदिप पौडेले नेतृत्व गरेसँगै स्वास्थ्य क्षेत्रमा देएिको समस्याको समाधान र सुधारका प्रयास थालिएको छ ।
यसै क्रममा आगामी पुस ४ गतेदेखि ‘फर्मासिष्ट’लाई अनिवार्य पोशाक र परिचयपत्रको व्यवस्था गर्न लागिएको छ । स्वास्थ्य तथा जनसङ्ख्या मन्त्रालयको आवश्यक सहयोगमा नेपाल फार्मेसी परिषद्ले यस्तो निर्णय लागू गर्न लागेको हो । स्वास्थ्य तथा जनसङ्ख्या मन्त्री प्रदीप पौडेलको आग्रह बमोजिम परिषद्ले पहिलो चरणमा फर्मासिष्टको पहिचान खुलाउन पोशाक अनिवार्य गर्ने निर्णय गरेको थियो । परिषद्ले फर्मासिष्ट तथा सहायकका लागि सेतो एप्रोनसहितको पोशाक र पोशाकमै परिचयपत्र अनिवार्य गर्ने जनाएको छ ।
कुनै पनि सामुदायिक फार्मेसी वा अस्पताल फार्मेसीमा औषधि वितरणमा कार्यरत फर्मासिष्टले एप्रोनसँगै हरियो पृष्ठभूमिमा सेतो रङको अक्षरमा नाम, पद र परिषद् दर्ता नम्बर तथा फार्मेसी सहायकले निलो पृष्ठभूमिमा सेतो रङको अक्षरमा नाम, पद र परिषद् दर्ता नम्बर अनिवार्य राख्नुपर्ने व्यवस्था गरिएको छ ।
यस निर्णयले औषधि बिक्री वितरणमा आधिकारिक व्यक्ति मात्र संलग्न हुने र कुनै कैफियत देखिएमा कारबाही गर्न सहयोग पुग्ने परिषद्का रजिस्टार सञ्जीवकुमार पाण्डेले बताउनुभयो । आज आइतबार मन्त्रालयमा भएको छलफलमा मन्त्री पौडेलले यस व्यवस्थाको अनुगमन कडा गर्न आग्रह गर्दै मन्त्रालयले कार्यान्वयनका लागि सहयोग गर्ने प्रतिबद्धता जनाउनुभयो ।
औषधि बिक्री वितरणलाई व्यवस्थित र नियमित बनाउन मन्त्री पौडेलले औषधि व्यवस्था विभागलाई अनुगमन बढाउन सजग गराउनुभएको छ । मन्त्रालयका प्रवक्ता डा प्रकाश बुढाथोकीले परिषद्को निर्णय कार्यान्वयनमा सहयोग गर्न मन्त्रालयले पत्राचार गर्ने बताउनुभयो । यसका अलावा औषधि बिक्री वितरणमा बेथिति देखिए नदेखिएको अनुगमन गर्ने र दोषी देखिएमा एकैसाथ कारबाही गरिने उहाँले बताउनुभयो ।
