फाइल तस्बिर
काठमाडौँ — नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहालले उपनिर्वाचनको नतिजाले एक्लै चुनाव लड्न जनादेश दिएको बताउनु भएको छ ।
उपनिर्वाचनको परिणामपछि केही उत्साहित हुनु भएका दाहालले मंगलबार प्रेस वक्तव्य जारी गर्दै जनताले उपनिर्वाचनमार्फत आफ्नो एजेन्डा र आफ्नै एकल पहिचानका साथ प्रतिस्पर्धा गर्न जनादेश दिएको उल्लेख गर्नुभयो । विभिन्न स्थानमा बनेका अवाञ्छित गठबन्धनलाई समेत जनताले नकार्दै माओवादीलाई जिताएको भन्दै अध्यक्ष दाहालले उपनिर्वाचनमार्फत जनताले प्रकट गरेको अभिमतलाई आफ्नो पार्टीले आफ्नो एजेन्डा र आफ्नै एकल पहिचानका साथ प्रतिस्पर्धा गर्न प्राप्त गरेको जनादेशको रुपमा लिएको विज्ञप्तिमा उल्लेख गर्नुभएको छ ।
अध्यक्ष दाहालले विज्ञप्तिमा भन्नुभएको ,निर्वाचित जनप्रतिनिधिको संख्या र जनमत दुवै हिसाबबाट पार्टीले उत्साहजनक सफलता प्राप्त गरेको छ । विभिन्न स्थानमा बनेका अवाञ्छित गठबन्धनलाई समेत चिर्दै जनताले प्रकट गरेको उत्साहपूर्ण समर्थनलाई हाम्रो पार्टी उच्च सम्मान गर्दछ । यसबाट हाम्रो पार्टीले अघि सारेका एजेन्डा र अघि बढाउन खोजेको अभियानको जनताले अनुमोदन गरेको पुष्टि भएको छ,।
अध्यक्ष दाहालले माओवादीले अघि सारेका सुशासन, सामाजिक न्याय र आर्थिक समृद्धिको एजेन्डालाई जनताले समर्थन गरेको समेत दावी गर्नुभयो । अध्यक्ष दाहालले माओवादीले अब जनताको जीवनस्तर बदल्ने अभियानलाई दृढतापूर्वक अघि बढाउने प्रतिबद्धता समेत व्यक्त गर्नुभएको छ । यस पटक उपनिर्वाचनमा दुई जिल्ला समन्वय समितिका प्रमुख र एउटा वडा अध्यक्ष पद यसअघि नै निर्विरोध भएको थियो भने आइतबार ४१ पदमा मतदान भएको हो । कुल ४४ पदमध्ये माओवादी ११ स्थानमा विजयी बन्न सफल भएको छ ।
