काठमाण्डौँ । यो साताको कारोबारको अन्तिम दिन शेयर बजार ओरालो लागेको छ ।
आज बजार खुलेसँगै ओरालो लागेको शयर बजार बन्द हुँदा ३१ दशमलव ४३ अङ्कले घटेर दुई हजार पाँच सय ९६ दशमलव ८२ विन्दुमा झरेको छ ।नेप्से झन्डै साढे २ महिनापछि २६ सय विन्दुमुनि झरेको हो ।
यसअघि गएको असोज १६ गते नेप्से २६ सय विन्दुमुनि झरेको थियो ।आज सबै समूहको शेयर घटेकोमा विकास बैंक, फाइनान्स, होटल, जलविद्युत्, बीमा, व्यापार समूहको शेयर उच्च अङ्कले ओरालो लागेको छ ।आज नारायणी विकास बैंकको शेयर नौ प्रतिशतभन्दा धेरैले घटेको छ ।
समग्रमा बजार घटेको दिन सपोर्ट माइक्रोफाइनान्स वित्तीय संस्थाको शेयर भने १० प्रतिशतले बढेर सकारात्मक सर्किट लागेको छ । यद्यपि कारोबार रकम भने सामान्य बढेको छ । हिजो चार अर्ब २७ करोडको शेयर किनबेच भएकोमा आज तीन सय १० वटा कम्पनीका ९८ लाख ३२ हजार कित्ता शेयर चार अर्ब ७६ करोड रुपैयाँमा किनबेच भयो ।
