महासंघको केन्द्रीय समितिमा निर्वाचित पदाधिकारीहरुलाई प्रमाणपत्र प्रदान

काठमाडौँ । नेपाल पत्रकार महासंघको केन्द्रयि समितिमा निर्वाचित पदाधिकारी तथा सदस्यहरुलाई प्रमाणपत्र प्रदान गरिएको छ ।

आज पत्रकार महासंघको केन्द्रीय कार्यालय सञ्चारग्राममा आयोजित एक विशेष कार्यक्रमकाबीच सभामुख देवराज घिमिरे र निर्वाचन समितिका प्रमुख प्रा. चिरञ्जीवी खनालले नवनिर्वाचित पदाधिकारी तथा कार्यसमितिका सदस्यलाई प्रमाणपत्र प्रदान गर्नुभयो । सो कार्यक्रमलाई सम्बोधन गर्दैै सभामुख घिमिरेले प्रेसमाथि अङ्कुश लगाउने कानुन बन्न नदिने प्रतिबद्धता व्यक्त गर्नुभएको छ ।

सभामुखले आफू प्रेस स्वतन्त्रता रक्षा गर्न प्रतिबद्ध रहेको बताउँदै प्रेसमाथि अङ्कुश लगाउने गरी कानुन नबनाउने बताउनुभएको हो । “नेपालको संविधानले पूर्ण प्रेस स्वतन्त्रताको ग्यारेन्टी गरेको छ”–सभामुख घिमिरेले भन्नुभयो,“प्रेस स्वतन्त्रतालाई कुण्ठित हुने गरी कुनै पनि कानुन बनाइने छैन ।”

महासङ्घका अध्यक्ष निर्मला शर्माले पत्रकार महासङ्घको गरिमालाई कायम राख्दै प्रेस स्वतन्त्रता र पत्रकारको पेशागत सुरक्षाका लागि लडिरहने प्रतिबद्धता व्यक्त गर्नुभयो । महासङ्घका पूर्वसभापति हरिहर विरहीले सङ्गठनलाई सबै पत्रकारको साझा संस्थाका रुपमा विकास गर्नु सुझाव दिनुभयो ।

मंसिर २८ गते सम्पन्न महासंघको निर्वाचनमा प्रेस युनियन र प्रेस चौतारीबीचको साझा उम्मेदवार निर्मला शर्मासहित अधिकांश चौतारी र युनियनको गठबन्धनले जित हासिल गरेका थिए ।