काठमाडौं । नेकपा एमालेबाट कारबारीमा पर्नुभएकी पार्टीको केन्द्रीय सदस्य उषाकिरण तिमिल्सिनाले आफूलाई कारबाही गरेर एमालेले देशभरका धेरै नेता कार्यकर्तालाई निरुत्साहित बनाएको बताइएकी छिन् । बुधबार एमाले स्थायी कमिटिको बैठकले पार्टीबाट ६ महिना निलम्बन गरेको निर्णयपछि नुवाकोट पुकारसँग आज बिहान संक्षिप्त प्रतिक्रिया दिँदै नेतृ तिलिल्सिनाले आफूले बोलेको कुरा एक सय वर्षसम्म पनि सत्य रहने उल्लेख गरिन ।
लोकतान्त्रिक पार्टीमा बोल्ने कुरा स्वभाविक भएपनि त्यसलाई पार्टीले बन्देज लगाउन खोज्नुले एमाले आफैलाई ठुलो घाटा भएको उनको प्रतिक्रिया थियो । तिमिल्सिनाले कारबाहीको निर्णयसँगै आफूले अन्य कुरा नसोचेको भन्दै आफ्नो आधिकारिक धारणा मिडियासामू आएर प्रष्ट पार्ने बताएकी छिन् । नुवाकोटको तारकेश्वर गाउँपालिकामा जन्मिएकी उनी विद्यार्थी राजनीतिबाट उदाएकी नेतृ हुन ।
नेकपा एमालेमा शसक्त रुपमा आवाज उठाउन सक्ने युवा नेतृ तिमिल्सिना सानै उमेरमा पार्टीको केन्द्रीय सदस्य बन्न सफल भएकी छिन् । उनी विद्यार्थी राजनीतिमा पनि लोकप्रिय थिईन । उनलाई कारबाही गरिएको विषयमा नुवाकोटका एमाले बाहेकका अन्य राजनीतिक दलहरुले पनि असन्तुष्टि जनाएका छन् । धेरैले सामाजिक सञ्जालमार्फत लिमिल्सिनालाई कारबाही गरेर एमालेले आफ्नो असली चरित्र देखाएको आरोप समेत लगाएका छन् ।
तिमिल्सिनासहित एमाले पोलिटब्यूरो सदस्य विन्दा पाण्डेले एमालेले भाटभटेनीका मालिक मीनबहादुर गुरुड.सँग पार्टी कार्यालय बनाउन लिएको सहयोग गलत भएको भन्दै टिप्पणी गरेका थिए । सोहि विषयलाई लिएर एमालेले नेतृद्धयसहित भीम रावललाई स्पष्टिकरण सोधेको थियो । सोही स्पष्टिकरण चित्त बुझ्दो नभएको भन्दै उषाकिरण र विन्दालाई ६ महिना निलम्बन गरेको छ भने रावललाई पार्टीको संगठित सदस्यबाट नै हटाएको छ । एमालेको उक्त निर्णयलाई लिएर सकारात्मक र नकारात्मक दुवै प्रतिक्रिया बाहिर आइरहेका छन् ।
