विदुर । जिल्ला प्रहरी कार्यालय नुवाकोटले १९ बर्ष कैद भुक्तान गर्न बाँकी रहेको कर्तव्य ज्यान मुद्दामा फरार रहेका एक जना प्रतिवादी २४ वर्षपछि पक्राउ गर्न सफल भएको छ ।
जिल्ला प्रहरी कार्यालय नुवाकोटका सूचना अधिकारी तिलक भारतीले दिनुभएको जानकारी अनुसार नुवाकोट जिल्लाको साविक गोस्र्याङ गाविस वडा नं ३ काभ्रेगाँउ बस्ने माईला भन्ने छेप्पा तामाङलाई सम्मानित उच्च अदालत पाटनको २०५७ माघ ९ गतेको फैसला बमोजिम २० बर्ष जन्म कैद भएको थियो । तर उनी फरार रहेका थिए । उनको खाजी गरिरहेको प्रहरीले २४ वर्षपछि पक्राउ गन सफल भएको छ ।
प्रहरीका अनुसार प्रहरी चौकी दानसिंह नुवाकोटबाट खटिएको प्रहरी अधिकृत सहितको टोलीले पुस २४ गते बिहान ७ बजेको समयमा तारकेश्वर गाउँपालिका वडा नं ५ लिग्लेनीमा लुकीछिपी बसेको अवस्थामा फेला पारेको थियो । उनको खोजी गर्ने क्रममा प्रहरीले सोही स्थानबाट पक्राउ गरि कैद भुक्तानका लागि अदालतको आदेशमा कारागार चलान गरेको छ । अदालतको आदेश अनुसार उनले १९ बर्ष कैद भुक्तान गर्नुपर्ने देखिएको छ ।
घटना विवरण अनुसार २०५५ साल वैशाख २० गते नुवाकोटको कल्याणपुर गाविसं वडा नं ७ देउडी सुकुम्बासी बस्ने बर्ष ५३ को लक्ष्मण तामाङलाई कर्तव्य गरी मार्ने कार्यमा संलग्न रहेको आरोपमा उनलाई कैद सजाय तोकिएको थियो ।
