काठमाडौं । नेपाली कांग्रेसका सभापति शेरबहादुर देउवाले एमसीसीमा धेरै विरोध भएपनि अहिले त्यो राम्रो पोजेक्ट रहछ भन्ने सबैले थाहा पाएको बताउनु भएको छ ।
नेपाली कांग्रेसको आर्थिक नीति तथा योजना विभागले आज पार्टी कार्यालय सानेपमा आयोजना गरेको नेपालको सन्दर्भमा वैदेशिक सहायताको उपयोगका विषयमा गरेको कार्यक्रममा सभापति देउवाले यस्तो बताउनु भएको हो । उहाँले भन्नुभयो,“हाम्रो देश भारत र चीनको बीचमा छ ।
त्यहाँको नीतिको असर यहाँ देखिन सक्दछ । त्यसको फाइदारबेफाइदा पनि हामीलाई समय अनुसार हुन सक्छ,” देउवाले भने, “एमसीसी पास गर्ने बेलामा हाम्रोमा धेरै ठूलो विरोध भयो । तर, पार्लियामेन्टले पास गरेपछि अहिले धेरैलाई थाहा भयो कि त्यो धेरै राम्रो प्रोजेक्ट रहेछ भन्ने ।” उहाँले राजनीतिक दलहरूले गरेका विरोधले नेपालमा कस्तो ऋण लिने र कति लिने भन्ने सन्दर्भमा प्रस्टता ल्याउन सहयोग पुगेको उल्लेख गर्नुभयो ।
पूर्व प्रधानमन्त्री देउवाले नेपालले अहिलेसम्म धेरै ऋण वल्र्ड बैंक, एसियाली बैक, अन्तराष्ट्रिय मुद्रा कोष आइएमएफमार्फत लिएको बताउनुभयो । उहाँले जाइकामार्फत जापान सरकारको ऋण लिएको भन्दै त्यो पनि अनुदानमा परिणत हुने गरेको बताउनुभयो ।
सभापति देउवाले कांग्रेसको आर्थिक नीति तथा योजना विभागका प्रमुख प्रा.डा. गोविन्दराज पोखरेलले महत्त्वपूर्ण छलफल राखेको भन्दै यसले आफूसहित नेपालीहरूलाई धेरै कुरा बुझ्न सहयोग पुगेको समेत बताउनुभयो । कार्यक्रममा आर्थिक विषयमा विज्ञहरुसँग छलफल आयोजना गरिएको थियो ।
