विदुर । निजी तथा आवासीय विद्यालय अर्गनाइजेसन नेपाल (प्याब्सन) नुवाकोटले विद्यार्थीहरुका लागि अभिमुखीकरण कार्यक्रमको आयोजना गरेको छ ।
आगमी चैत्र महिनामा आउँदै गरेको एसईई परीक्षाको तयारीका विषयमा विषय विज्ञहरुमार्फत मार्फत विद्यार्थीलाई अभिमुखीकरण प्रदान गरिएको प्याब्सन नुवाकोटका अध्यक्ष पुरुषोत्तम अधिकारीले जानकारी दिनुभयो । कार्यक्रममा प्याब्सनसँग आवद्ध विद्यालयहरुमा अध्ययनरत विद्यार्थीहरुको उल्लेख सहभागिता रहेको थियो ।
प्याब्सन नुवाकोटका अध्यक्ष पुरुषोत्तम अधिकारीको अध्यक्षतामा भएको उक्त कार्यक्रम नुवाकोट जिल्लाको लागि पहिलो कार्यक्रम भएको बताइएको छ । सहभागी विद्यार्थीहरुले कार्यक्रमबाट आफुहरुलाई एसईई परिक्षाको तयारी र राम्रो नतिजा प्राप्त गर्नका लागि फलदायी हुने विश्वास व्यक्त गरेका छन् । नुवाकोट पुकरासँगको प्रतिक्रियामा उनीहरुले आगामी दिनहरुमा पनि यस्ता कार्यक्रमहरुको आवश्यकता रहेको बताए् ।
कार्यक्रममा अध्यक्ष अधिकारीले यस पटकबाट शुरु भएको यो कार्यक्रम निरन्तरता पाउने र आगामी दिनहरुमा विद्यालय, शिक्षक र विद्यार्थीहरुका आवश्यकतालाई ध्यानमा राखि थप तालिम, सेमिनार र अभिमुखीकरण कार्यक्रम सञ्चालन गर्दै जाने प्रतिवद्धता जनाउनु भएको थियो । बट्टारस्थित रानीमौरी पार्टी प्यालेसमा भएको कार्यक्रममा निजी विद्यालयका प्रिन्सिपल, सञ्चालक तथा कक्षा १० मा अध्ययनरत विद्यार्थीहरुका साथै अभिभावकहरुको समेत सहभागिता रहेको थियो । कार्यक्रममा अध्यक्ष अधिकारीकाले विज्ञ तथा अतिथिहरुलाई काठबाट बनाइएको नुवाकोट दरबार अंकित मायाको चिनोसहित विदा गर्नुभएको थियो ।
नुवाकोट जिल्लामा झण्डै १सय ५० भन्दा बढि संस्थागत विद्यालयहरु रहेका छन् । जिल्ला सदरमुकाम विदुरमा ५० भन्दा बढि विद्यालयहरु रहेका छन् । संस्थागत विद्यालयहरुले प्रदान गर्दै आएको गुणस्तरिय शिक्षाका कारण विद्यार्थीहरुलाई अध्ययननका लागि राजधानी लगायतका शहरहरुमा जानुपर्ने बाध्यता क्रमश ः पातलो हुँदै गएको विद्यालय सञ्चालकहरुको दावी रहेको छ ।
एसइई परीक्षाको नतिजामा केही सामूदायिक विद्यालय बाहेक अधिकांश नीजि क्षेत्रबाट सञ्चालित विद्यालयहरुमा अध्ययन गर्ने विद्यार्थीहरुले उत्कृष्ट नतिजा ल्याउँदै आएका छन् । जसले गर्दा पनि विद्यार्थीहरुको रोजाई संस्थागत विद्यालयतर्फ नै हुने गरेको देखिन्छ ।
