सुर्यगढी । नुवाकोट जिल्लाको ऐतिहासिक स्थल सूर्यगढीमा सूर्यगढी गाउँपालिकाको १६ औँ गाउँसभा सम्पन्न भएको छ । गाउँपालिका अध्यक्ष सन्तबहादुर घलेको अध्यक्षतामा सम्पन्न भएको गाउँसभाले पालिकाको आर्थिक र सामाजिक विकासमा महत्वपूर्ण निर्णय गरेको छ ।
गाउँपालिकाको आर्थिक वर्षको अर्धवार्षिक समीक्षासहित विकास योजनाको प्रगति विवरण गर्दै अध्यक्ष घलेले पर्यटकीय आधार तयार पार्ने, ऐतिहासिक सम्पदाको संरक्षण गर्ने, कृषि सुधार गर्ने तथा जनताको आवश्यकताहरू पूरा गर्ने प्रतिबद्धता व्यक्त गर्नुभएको छ । अध्यक्ष घलेले ऐतिहासिक सूर्यगढी क्षेत्रलाई पर्यटकीय गन्तव्यका रूपमा विकास गर्न लगायतका विभिन्न योजानहरुका विषयमा जानकारी दिनुभएको छ ।सभामा अध्यक्ष घलेले पार्क निर्माण, छिडी (सिँढी) निर्माण, गुरु योजना निर्माण, होमस्टे सञ्चालन, बागेश्वरी मन्दिर संरक्षण, चमेरे ओडार संरक्षण, तथा गोलेराजाको दरबार संरक्षण जस्ता योजना अघि सारिएको जानकारी दिनुभयो ।
गाउँपालिकाले कृषि क्षेत्रमा सुधार ल्याउन लोपोन्मुख बीउ संरक्षण तथा फापरको बीउ वितरण गर्ने नीति लिएको छ । कृषि उत्पादन वृद्धि गर्न तथा स्थानीय किसानहरूलाई आत्मनिर्भर बनाउन नयाँ प्रविधि तथा कार्यक्रम ल्याउने तयारी भइरहेको अध्यक्ष घलेले सार्वजनिक गर्नुभएको कार्यक्रममा उललेख गरिएको छ । गाउँपालिकाको आर्थिक वर्षका लागि कुल ४३ करोड ३४ लाख रुपैयाँ विनियोजन भएकोमा चालु खर्चतर्फ २६ करोड र पुँजीगत खर्चतर्फ १७ करोड ३४ लाख छुट्याइएको छ । पुस मसान्तसम्म ९ करोड ९६ लाख रुपैयाँ खर्च भइसकेको छ भने पुँजीगत खर्च ३८.२७% पुगेको जानकारी दिइएको छ ।
गाउँसभामा वडासभा सदस्यहरू, स्थानीय प्रतिनिधिहरू तथा सरोकारवालाहरूको उपस्थितिमा समसामयिक विषयहरूमा छलफल भएको थिया े। अध्यक्ष घलेले सीमित बजेटबाट जनताको असीमित आवश्यकताहरू पूरा गर्न चुनौती रहेको उल्लेख गर्दै प्रदेश तथा संघ सरकारको सहकार्यमा विकासका कामलाई निरन्तरता दिने प्रतिबद्धता जनाउनु भएको छ ।
