नुवाकोट जिल्लाको जिल्ला स्तरीय अस्पताल त्रिशुली अस्पतालले जुन उत्कृष्टता हासिल गर्न सफल भएको छ यो पक्कै पनि एउटा महत्वपूर्ण उपलब्धी मान्नुपर्दछ ।
तीन जिल्लाका लाखौ नागरिकहरुको सहज पहँुच भएको अस्पतालले यति राम्रो सुविधासहित सेवा प्रदान गरेको छ यसलाई स्वास्थ्य क्षेत्रमा लोकतान्त्रिक सरकारको तर्फबाट गरिएको सकारात्मक प्रयास मान्नुपर्दछ । २०१२ सालमा भारतको एक कम्पनीले जलविद्युत निर्माणमा सहभागि मजदुरहरुको उपचारका लागि स्थापना गरिएको सामान्य स्वास्थ्य सेवाले एक ७ दशकपछि सुविधा सम्पन्न भवनसहितको सेवा प्रदान गरिरहेको छ यो नुवाकोटबासीका लागि धेरै ठूलो खुशीको कुरा मान्नुपर्दछ । यस्ता धेरै असपतालहरु छन् जो यो अवस्थमा छैनन् ।
नुवाकोटमा अस्पताललाई यो अवस्थामा ल्याउनका लागि धेरै पक्षको सहयोग हुँदै आएको छ र अस्पताल आज यो अवस्थामा पुगेको छ । पछिल्लो पटक बागमती प्रदेश स्वास्थ्य मन्त्रालयअन्तर्गत स्वास्थ्य निर्देशनालयको न्यूनतम सेवा मापदण्ड कार्यान्वयन समितिको रिपोर्ट अनुसार अस्पतालले न्यूनतम सेवा मापदण्ड कार्यान्वयनमा ८१ प्रतिशत अंक हासिल गर्दै बागमती प्रदेशको उत्कृष्ट अस्पताल बन्न सफल भएको छ । अस्पतालले अहिले एक सय शष्याको सुविधासहित धेरै विशेषज्ञ चिकित्सकहरुमार्फत सर्वसाधराणका लागि सेवा प्रवाह गर्दै आएको छ ।
गाउँघरमा समान्य मानिस र राजधानीसँग पहुँच नभएका र उपचारका लागि खर्च गर्न नसक्नेहरुका लागि जसरी त्रिशुली अस्पताल एक देशभरका अस्पताललाई राज्य यो अवस्थामा लैजान सक्नुपर्दछ । नुवाकोटको यो अस्पताललाई अब कुनै पनि बहानामा यो भन्दा कमको बनाउने अधिकार कसैलाई छैन । सरकारी अस्पताल भएकाले बेला बेलामा राजनीतिक चलखेलको कुरा सुनिने गरेको छ । अस्पताल जस्तो पवित्र स्थानमा त्यो हुनु हुँदैन । अस्पतालमा जो आएपनि वा जसले नेतृत्व गरेपनि त्यसलाई नागरिकको सेवामा प्रयोगमा लगाउन सक्नुपर्दछ ।
जनप्रतिनिधि भनेको जनताका प्रतिनधि हो । उनीहरुले जनताका पक्षमा काम गर्नुपर्दछ । अस्पतालले हाल जुन सेवा प्रदान गरेर आफूलाई स्तरीय बनाउन सफल भएको छ त्यसलाई टिकाउने जिम्मा नेपाल सरकार, प्रदेश र स्थानीय सरकारको हो । पछिल्लो समय अस्पतामा अध्यक्ष भएसँगै उपेन्द्र बुढाथोकीले बिरामीका लागि भिडियो कल गरेर सेवा लिनेदेखि नाकको अप्रेसन मेशिनबाट गर्नेसम्मको व्यवस्थापनमा भूमिका खेलेका छन् त्यो निश्चयकनै सकारात्मक प्रयास मान्नुपर्दछ । यसलाई निरन्तरता दिनेतर्फ अब व्यवस्थापनको ध्यान पुग्नुपर्दछ ।
कहिलेकाई अस्पतालको सेवा र सुविधा हुँदाहुँदै पनि , चिकित्सक रकर्मचारी अभाव हुने गरेको जनगुनासो आउने गरेको छ । यसतर्फ भने अस्पताल विकास समितिले समयमा नै ध्यान दिनुपर्दछ । कर्मचारी वा चिकित्सक विनाको अस्पतालको कुनै महत्व हूँदैन । गाउँ घरबाट थोरै खर्च बोकेर आएका बिरामीहरुले भनेका बेला चिकित्सक पाएनन् भने त्यो भन्दा दुःखको कुरा अरु के हुन सक्छ ? । यसतर्फ समितिकोको ध्यान पुग्नु जरुरी छ ।
यो सँगै अस्पतालले जति सेवा दिएको छ त्यो महत्वपूर्ण त छदैछ । तर त्यसलाई अझ स्तरीय र थप सुविधा बढाउने तर्फ पनि सरकारको ध्यान पुग्नु पर्दछ । क्षेत्रगत हिसाबले निकै ठूलो भुगोलका लागि भएकाले पनि अस्पतालले राजधानीमा पाउने सुविधा दिन सक्यो भने नागरिकलाई धेरै ठुलो राहत मिल्नेछ । यसले संघीयताको मर्म र भावनाको पनि सम्मान गर्नेछ । तसर्थ अबको नेतृत्वको ध्यान त्यसतर्फ पुगोस् भन्ने सन्देशकासाथ अस्पतालको यो उत्कृष्टता निरन्तर कायम रहोस् हार्दिक शुभकामना ।
