
नेका संसदीय दलको बैठक काठमाडौँ, २० वैशाखः सङ्घीय संसद भवन, नयाँ बानेश्वरस्थित ल्होत्से हलमा बसेको नेपाली कांग्रेसको संसदीय दलको बैठकमा सहभागीहरु ।
काठमाडौं । नेपाली कांग्रेसले सरकारले सार्वजनिक गरेको आर्थिक वर्षको नीति तथा कार्यक्रम राष्ट्रिय आवश्यकता अनुसार आएको भन्दै समर्थन जनाएको छ । शनिबार (वैशाख २०) नयाँ बानेश्वरमा बसेको कांग्रेस संसदीय दल बैठकले नीति तथा कार्यक्रममा धेरै कुराहरू समेटिएको र राष्ट्रिय आवश्यकताअनुसार आएको भन्दै कांग्रेसले समर्थन जनाउने निर्णय गरेको कांग्रेस संसदीय दलका प्रमुख सचेतक श्यामकुमार घिमिरेले जानकारी दिनुभयो ।
कांग्रेसको मागबमोजिम नै ल्याइएकाले नीति तथा कार्यक्रमलाई समर्थन गरिने उहाँको भनाई भियो । उहाँले कांग्रेस सांसदले संसद् बैठकमा नीति तथा कार्यक्रमका पक्षमा बोल्ने जानकारी गराउँदै नीति तथा कार्यक्रमका बारेमा कांग्रेसले सरकारलाई सकारात्मक र रचनात्मक सुझाव दिने बताउनुभयो ।
नीति तथा कार्यक्रम सम्बोधन गर्ने गरी बजेट निर्माण गर्न सरकारलाई सचेत गराउने निर्णय गरिएको उनले जानकारी दिए । उनले भने, “नीति तथा कार्यक्रम कार्यान्वयन हुन बजेटमा पनि समावेश हुनुपर्छ । अगामी बजेट तर्जुमा गर्दाखेरि नीति तथा कार्यक्रमलाई सम्बोधन गर्ने गरी तर्जुमा गरियोस् भनेर निर्णय गरेका छौँ ।”
उहाँले शिक्षकसँग गरिएको सहमतिअनुसार आउँदो असार १५ गतेसम्म विद्यालय शिक्षा विधेयक संसदबाट पारित गर्ने विषयमा संसदीय दलले थप प्रतिबद्धता जनाएको जानकारी पनि दिनुभयो । बैठकले पछिल्लो समय भारतको उडिशास्थित कलेज र पहलगाम तथा बेलायतमा भएको नेपालीको मृत्यु घटनाको निन्दा र दुःख व्यक्त गर्दै ती घटना जाँचबुझका निम्ति माग गर्ने निर्णय गरेको घिमिरेले जानकारी दिनुभयो ।