नुवाकोट पुकार
नुवाकोट । नेपाली कांग्रेस नुवाकोट क्षेत्र नं. १ मा सम्पन्न अधिवेशन तथा निर्वाचन प्रक्रियालाई लिएर कांग्रेस नेता रामेश्वर अधिकारीले व्यङ्ग्यात्मक टिप्पणी गरेका छन्।
नुवाकोट पुकारले क्षेत्र नं. १ को अधिवेशन, निर्वाचनमा देखिएको समूहगत प्रतिस्पर्धा र आन्तरिक तालमेलबारे प्रतिक्रिया माग्दा अधिकारीले कांग्रेेेसका दुई परम्परागत राजनीति शक्ति अर्जुननरसिंह केसी र रमेश महत पक्षले ‘धोती खोलेर मुख छोपेर लाज ढाक्ने काम’ भएको भन्दै व्यङ्ग्य गरेका हुन्।
जिल्लामा रहेका दुई गुटकाे तालमेल प्रति असन्तुष्ट रहँदै आएका अधिकारीले आफ्नो स्वार्थका लागि कार्यकर्ता जुधाउने नेताहरुकाे बानीले कांग्रेस कमजोर बनेकाे टिप्पणी गरे ।
क्षेत्र नं. १ को अधिवेशनमा बाहिर महत र केसी पक्षबीच प्रतिस्पर्धाको वातावरण बनाएर कार्यकर्तालाई निर्वाचनमा सहभागी गराइएको, तर आफू र आफू निकटका उम्मेदवारलाई जिताउन भित्रभित्रै तालमेल गरिएको आरोप कांग्रेसका केही नेता–कार्यकर्ताले लगाउँदै आएका छन्।
निर्वाचन प्रक्रियाप्रति असन्तुष्ट कांग्रेस कार्यकर्ताहरूले बाहिर देखाइएको प्रतिस्पर्धा र भित्र भएको भनिएको समीकरणबीच विरोधाभास रहेको टिप्पणी गरेका छन्। यही विषयलाई लक्षित गर्दै अधिकारीको व्यङ्ग्यात्मक अभिव्यक्ति आएको हो।
अर्कोतर्फ, अधिवेशनमा युवा नेताहरूको विद्रोही सक्रियताले कांग्रेसका परम्परागत समूहलाई चुनौती दिएको चर्चा पनि छ। पुराना समूहबीचको समीकरणसँगै नयाँ पुस्ताका नेताहरूको प्रतिस्पर्धाले क्षेत्र नं. १ को अधिवेशनलाई थप चर्चामा ल्याएको छ।
अधिवेशनको परिणाम र प्रक्रियाप्रति कांग्रेसका केही नेता–कार्यकर्ता असन्तुष्ट देखिएका छन्। यही क्रममा प्रभावशाली नेता तथा तादी गाउँपालिकाका निवर्तमान अध्यक्ष नारायण पाण्डेले सक्रिय राजनीतिबाट विश्राम लिने घोषणा गरेपछि क्षेत्र नं. १ को पछिल्लो राजनीतिक अवस्थाबारे थप बहस सुरु भएको छ।
तपाईको प्रतिक्रिया दिनुहोस्