नुवाकोट पुकार
नुवाकोट । राष्ट्रिय प्रजातन्त्र पार्टी (राप्रपा) नुवाकोटको जिल्ला अध्यक्षमा कुलबहादुर खड्गी भारी मतान्तरले विजयी भएका छन्। जिल्ला अधिवेशनअन्तर्गत भएको निर्वाचनमा खड्गीले आफ्ना प्रतिस्पर्धी विमल थापालाई ५३ मतान्तरले पराजित गर्दै अध्यक्षमा निर्वाचित भएका हुन्।
कुल २४३ मतदाता रहेको अधिवेशनमा २०९ मत खसेको थियो। त्यसमध्ये १२ मत बदर भएको थियो। खड्गीले १२५ मत प्राप्त गर्दा उनका प्रतिस्पर्धी थापाले ७२ मत प्राप्त गरेका थिए।
अधिवेशनबाट जिल्ला सदस्यमा महेश ढंगोल र यशाेदा दाहालले बराबरी १२२ मतसहित प्राप्त गरेका छन्। सदस्यमा यसोदा दाहाल, रामकुमार राई, बाबुराम राई, गोविन्द गिरी, यज्ञराज केसी, अस्मिता परियार, दिपेन्द्र पण्डित, मुना थापा, शर्मिला तामाङ, रणबहादुर न्यौपाने, राजाराम पाण्डे र दिपेश लामा २२ जना निर्वाचित भएको निर्वाचन समिति संयाेजक उमेश दाहालले जानकारी दिएका छ । यस्तै कुल सदस्यकाे २५ प्रतिशत अध्यक्षले मनाेनित गर्ने व्यवस्था रहेकाे छ ।
नवनिर्वाचित अध्यक्ष खड्गी राप्रपा नुवाकोटका संस्थापक नेतामध्ये एक हुन्। यसअघि एक कार्यकाल जिल्ला अध्यक्षको जिम्मेवारी सम्हालिसकेका उनी पार्टी एकतापछि पनि जिल्ला अध्यक्षकै भूमिकामा रहेका थिए।
उनको नेतृत्वमा नुवाकोटमा राप्रपा थप बलियो, एकताबद्ध र संगठित हुने अपेक्षा गरिएको छ। निर्वाचनपछि नुवाकोट पुकारसँग कुरा गर्दै अध्यक्ष खड्गीले पार्टीलाई एकताबद्ध बनाउँदै थप सशक्त र व्यवस्थित रूपमा अघि बढाउने प्रतिबद्धता व्यक्त गरे।
यसैबीच, नवनिर्वाचित जिल्ला कार्यसमितिलाई पार्टीका पूर्वअध्यक्ष डा. प्रकाशचन्द्र लोहनीको उपस्थितिमा आयोजना हुने कार्यक्रममा प्रमाणपत्र प्रदान गरिने जनाइएको छ।
तपाईको प्रतिक्रिया दिनुहोस्