नुवाकोट पुकार
काठमाडौं । काठमाडौंको गोकर्ण क्षेत्रमा करिडोर विस्तारको कामका क्रममा राष्ट्रिय स्वतन्त्र पार्टी (रास्वपा)का सांसद राजु पाण्डे र नेपाली सेनाका एक जवानबीच भएको भनाभनको भिडियो सामाजिक सञ्जालमा व्यापक रूपमा फैलिएको छ। घटनापछि नेपाली सेनाले उक्त विषयलाई गम्भीर रूपमा लिएको जनाएको छ।
घटना गोकर्णस्थित नेपाल ट्रस्टको स्वामित्वमा रहेको जग्गामा सञ्चालित नेपाली सेनाको विपद् व्यवस्थापन तालिम केन्द्रको पर्खाल हटाउने क्रममा भएको हो। करिडोर विस्तारका लागि डोजर प्रयोग गरेर पर्खाल भत्काउने प्रयास भइरहेका बेला त्यहाँ खटिएका सैनिकले काम रोक्न आग्रह गरेका थिए।
भिडियोमा सैनिकले उक्त स्थान सैन्य प्रयोजनका लागि प्रयोग भइरहेको भन्दै पर्खाल तत्काल नभत्काउन अनुरोध गरेका देखिन्छन्। उनले आवश्यक अनुमति र सम्बन्धित कागजातबारे पनि जिज्ञासा राखेका छन्।
जवाफमा सांसद पाण्डेले करिडोर विस्तार सार्वजनिक हितको विषय भएकाले सबैले समान रूपमा मापदण्ड पालना गर्नुपर्ने बताएका छन्। उनले आवश्यक प्रक्रिया बुझेर र सम्बन्धित निकायको निर्देशनअनुसार आफू त्यहाँ पुगेको दाबी गर्दै डोजर नरोकिने बताएका भिडियोमा सुनिन्छ।
सैनिकले पर्खाल हटाउँदा सुरक्षा तथा जंगली जनावरको व्यवस्थापनमा समस्या आउन सक्ने तर्क राखे पनि दुवै पक्षबीच केहीबेर चर्काचर्की भएको देखिन्छ।
घटनाको भिडियो सार्वजनिक भएपछि नेपाली सेनाले यसलाई गम्भीर रूपमा लिएको जनाएको छ। सेनाको उच्च स्रोतका अनुसार घटनाबारे सम्बन्धित निकायसँग समन्वय गरी आवश्यक प्रक्रिया अघि बढाइएको छ।
यस घटनाबारे सम्बन्धित सरकारी निकाय वा सांसद पाण्डेको तर्फबाट औपचारिक विस्तृत प्रतिक्रिया भने सार्वजनिक भइसकेको छैन।
तपाईको प्रतिक्रिया दिनुहोस्