फाइल तस्बिर
काठमाण्डौ – भक्तपुरमा रहेको केदारनाथको शीर डोलेश्वर महादेव मन्दिरमा ३८ दिने श्रावणाी मेला सकिएको छ । साउन १ गतेदेखि शुरु भएको मेला बिहीबार सकिएको हो ।
सूर्यविनायक नगरपालिका‐८ सिपाडोलमा रहेको डोलेश्वर महादेव मन्दिरलाई भदौ ६ गते केदारनाथको शिर भाग घोषणा गरिएको दिन हिजो मन्दिरका चारै ढोका खुला गरी दर्शनार्थीले मन्दिरभित्र पसेर पूजा गर्न पाउने व्यवस्था गरिएको थियो ।
हिजो १५ हजारभन्दा धेरै भक्तजनले दर्शन गरेका डोलेश्वर महादेव संरक्षण तथा विकास समितिका अध्यक्ष धर्मराज बस्नेतले जानकारी दिनुभयो । उहाँका अनुसार यस मन्दिरमा महाशिवरात्रि, अक्षय तृतीया र भदौ ६ गते गरी वर्षमा तीन दिन मात्रै मन्दिरको चारै ढोका खुला गरेर दर्शनार्थीलाई मन्दिरभित्र पसेर शिला छोएर पूजा गर्ने व्यवस्था गरिएको छ ।
श्रावणी मेला अवधिभर डोलेश्वरमा चार लाख भक्तजनको आगमन भएको समितिका महासचिव हरिशरण बस्नेतले जानकारी दिनुभयो । मेलाको अवधिभर मन्दिर आउने भक्तजनबाट दानस्वरुप ८५ लाख ४७ हजार रुपैयाँ सङ्कलन भएको समितिले जनाएको छ । त्यसमध्ये, ४५ लाख २० हजार रुपैयाँ भक्तजनहरूले रसिद काटेर सहयोग गरेको र ४० लाख २७ हजार रुपैयाँ मठ तथा मूर्तिमा चढाइएकोबाट सङ्कलन भएको हो ।
