नुवाकोट पुकार
विदुर । पोष्टबहादुर बोगटी बहुप्राबिधिक शिक्षालयमा अध्ययनरत प्रशिक्षार्थीहरुलाइ निशुल्क शिक्षालय पोषाक वितरण गरिएको छ । नुवाकोटको विदुर नगरपालिका वडा नम्बर १ ढुङ्गेमा सञ्चालित बहुप्राबिधिक शिक्षालयमा सिक, कमाउ र तिर अभियान अन्तर्गत शिक्षालयको उत्पादन इकाईद्वारा पशु बिज्ञान र बालि बिज्ञानका ६२ जना प्रशिक्षार्थीहरुलाइ निशुल्क शिक्षालय पोषाक वितरण गरिएको हो ।
बिदुर नगरपालिकाको उपप्रमुख प्रभा बोगटीको प्रमुख आतिथ्यतामा भएको कार्यक्रममा जनप्रतिनिधि,समाजसेवी,विद्यार्थी, शिक्षकहरुको उपस्थिति रहेको थियो । कार्यक्रममा प्रमुख अतिथि उपमेयर बोगटीले आफ्नो शैक्षिक गुणस्तर बृद्धि गर्दै आत्मनिर्भर बनेर समाज रुपान्तरणको मेरुदण्ड बन्न प्रशिक्षार्थीहरुलाई सुझाव दिनुभएको थियो । उहाँले नुवाकोट जिल्लाको एक उदाहरणीय प्राविधिक शैक्षिक संस्था भएकाले यसको गरिमा र महत्व जोगाउनु पर्नेमा पनि जोड दिनुभयो ।
कार्यक्रममा वडा नं १ का वडा अध्यक्ष लेलिन रञ्जितले पनि शैक्षिक गुणस्तरमा जोड दिनुभएको थियो । नुवाकोट तुप्चेमा जन्मनु भएको तत्कालिन माओवादीका महासचिव स्वर्गीय पोष्टबहादुर बोगटीको स्मृतिमा खोलिएको उक्त प्राविधिक शिक्षालयलाई नेपाल सरकारको सहयोगमा सञ्चालन गरिदै आएको छ । नुवाकोट र रसुवा जिल्लाकै एकमात्रै आंगिक शिक्षालय पोष्टबहादुर बोगटी बहुप्राबिधिक शिक्षालयले प्राबिधिक शिक्षा क्षेत्रमा दर्बिलो उपस्थिति जनाउन समेत सफल भएको छ ।
पोष्टबहादुर बोगटी बहुप्राबिधिक शिक्षालयमा अध्ययन गर्नुभएकी छात्रा पुजा अधिकारीले बिएससी एजी Bsc AG को प्रबेश परिक्षामा सर्वोत्कृष्ट अंक ल्याउन सफल भएकी छिन् ।
२८ जना सहभागी प्रशिक्षार्थी मध्ये २५ जना प्रशिक्षार्थी उत्तीर्ण गराइ नेपाल प्रथम हुन सफल भएको छ । जसमा १२ जना प्रशिक्षार्थी ८० प्रतिशत भन्दा बढि अंक सहित उत्तीर्ण भएका छन् भने ८७।१६ प्रतिशत सहित सिटिईभिटि सिस्टमको आंगिक कलेज तर्फ टप गर्नेमा युनिशा पन्थ रहेकी छिन ।
