देवीघाट । ३३ औँ अन्तर्राष्ट्रिय अपाङ्गता दिवसका अवसरमा नुवाकोटमा पनि विभिन्न कार्यक्रमको आयोजना गरि मनाइएको छ । यसै क्रममा नुवाकोट अपाङ्ग संरक्षण सेवा संस्था नुवाकोटको आयोजनामा विदुर नगरपालिका वडा नं ५ देवीघाटमा एक कार्यक्रमको आयोजना गर्दै सो दिवस मनाइएको छ ।
बागमती प्रदेश सभा सदस्य तथा नेपाली कांग्रेस नुवाकोटका सभापति रमेश कुमार महतको प्रमुख अतिथ्यता भएको कार्यक्रममा नुवाकोट अपाङ्ग संरक्षण सेवा संस्थाका अध्यक्ष भरतप्रसाद दाहालले सभापतित्व गर्नुभएको थियो । कार्यक्रममा प्रमुख अतिथि महतले अपाङ्गता भएकाहरुको संरक्षण र हितका लागि आफूले सक्दो सहयोग गर्ने प्रतिवद्धता जनाउनु भएको थियो । उहाँले अपांड्डगता भएकाहरुलाई सरकारले विभिन्न प्रकारका तालिमहरु सञ्चालन गर्दै आएको भन्दै आफूले पनि यसको लागि सहयोग गर्ने उल्लेख गर्नुभयो ।
कार्यक्रममा विशेष अतिथि नेपाली कांग्रेसका उपसभापति राजु थापाले अपाङ्गता भएका व्यक्तिहरुलाई विशेष खालको तालिमको व्यवस्था गरी स्वरोजगार बनाउनुपर्नेमा जोड दिनुभएको थियो । कार्यक्रममा देवीघाट जेष्ठ नागरिक प्रतिष्ठानका अध्यक्ष विष्णु नेपाल ,प्रकाश जंग संस्कृत माध्यमिक विद्यालयका प्रधानाध्यापक मञ्जु चित्रकार, देवीघाट जाल्पा क्लबका अध्यक्ष नवीन चित्रकार लगायत भजनी टोलीको पनि सहभागिता रहेको थियो ।
कार्यक्रममा अध्यक्ष भरत दाहालले संस्थाको बारेमा जानकारी गराउनु भएको थियो । उहाँले नुवाकोट जिल्लामा अपांगता भएका व्यक्तिहरु धेरै पनि उनीहरुका विषयमा स्थानीय सरकारले कुनै चासो नदिएको भन्दै गुनासो समेत गर्नुभयो । सो अवसरमा रेसलर नेपाली ब्रोले पनि संस्थालाई सकेको सहयोग गर्ने प्रतिबद्धता व्यक्त गर्नुभएको थियो।
