काठमाडौं । सहकारी ठगी प्रकरणलगायत विभिन्न मुद्दामा प्रहरीको हिरासतमा रहेका रास्वपाका सभापति रवि लामिछानेको सांसद पद गुम्ने भएको छ । उनीसहित आज ३१ जना विरुद्ध सहकारी ठगी, संगठित अपराध र सम्पत्ति शुद्धिकरणमा सरकारी वकिलको कार्यालयले मुद्दा दायर गरेको छ ।
यो मुद्दा दायर भएसँगै लामिछानेको सांसद पद स्वतः निलम्बन हुने भएको हो । सम्पत्ति शुद्धीकरण ऐनअनुसार लामिछानेको सांसद पद गुम्ने भएको हो । योसँगै लामिछानेको सांसद पद दोस्रो पटक निलम्बन हुने भएको हो ।
सम्पत्ति शुद्धीकरण (मनी लाउन्डरिङ) निवारण ऐनअनुसार अभियोगपत्र दर्ता भएपछि स्वत पद निलम्बनमा पर्छ । ऐनको दफा(२७ अनुसार मुद्दाको अन्तिम किनारा नलागेसम्म कर्मचारी, पदाधिकारी वा राष्ट्र सेवक स्वतः निलम्बन भएको मानिन्छ, भन्ने उल्लेख गरिएको छ । सोही अनुसार अदालतमा अभियोगपत्र दर्ता गरिएकोबारे संसद् सचिवालयलाई जानकारीसहितको पत्र पठाउने तयारी भइरहेको बताइएको छ ।
सम्पत्ति शुद्धीकरण (मनी लाउन्डरिङ) निवारण ऐनको दफा २७ मा स्वत निलम्बन हुने प्रबन्ध रहेको छ । प्रचलित कानून बमोजिम स्थापित संगठित संस्थाको कुनै पदाधिकारी वा कर्मचारी वा कुनै राष्ट्रसेवक यस ऐन बमोजिम थुनामा रहेकोमा त्यसरी थुनामा रहेको अवधिभर र निजउपर दफा २२ बमोजिम मुद्दा दायर भएकोमा सो मुद्दाको किनारा नभएसम्म त्यस्तो कर्मचारी, पदाधिकारी वा राष्ट्र सेवक स्वतः निलम्बन भएको मानिनेछ, उक्त दफामा उल्लेख गरिएको छ ।
