१३ पुस, विदुर । निजी तथा आवासीय विद्यालय अर्गनाइजेसन (प्याब्सन) नुवाकोटको नवौँ अधिवेशनबाट अध्यक्ष पदमा पुरुषोत्तम अधिकारी निर्विरोध निर्वाचित भएका छन् । अधिकारीको अध्यक्षतामा सात सदस्यीय नयाँ कार्यसमिति चयन गरेको छ । अध्यक्षमा निर्वाचित अधिकारी यसअघि संस्थाको सचिव रहेर काम गर्नुभएको थियो । अधिकारी सुर्यगढी गाउँपालिकामा रहेको नुवाकोट ग्लोरी इङ्ग्लिस बोर्डिङ स्कुलका सञ्चालक हुनुहुन्छ ।
संस्थाको उपाध्यक्षमा राजन खतिवडा, सचिवमा रामजी भट्ट, कोषाध्यक्षमा रामशरण रिमाल सर्वसम्मत चयन हुनुभएको छ । संस्थाको सदस्यहरुमा गगनकल्याण प्रधान, यादव अधिकारी र गोविन्द प्याकुरेल चयन हुनुभएको प्याब्सन नुवाकोटले जनाएको छ ।
निर्वाचन संयोजक तथाप्याब्सन बागमती प्रदेशका वरिष्ठ उपाध्यक्ष मुरारी प्रकाश सञ्जेलले निर्वाचित पदाधिकारी र सदस्यहरुलाई प्रमाणपत्र प्रदान गर्नुभएको थियो । नुवाकोट जिल्लामा ५० भन्दा बढि संस्थागत विद्यालयहरु रहेका छन् । जसको नेतृत्व प्याब्सनले गर्दै आएको छ ।
कार्यक्रममा सहभागीहरुले शिक्षा क्षेत्रमा भएको राजनीतिक हस्तक्षेप, शैक्षिक गुणस्तरमा देखिएको ह्रासका कारण गुणात्मक शिक्षा लिने नाममा नेपाली विद्यार्थी र पूँजी बाहिरिने क्रम बढेकाले शिक्षा ऐन, कानून तर्जुमा गर्दा यी समस्या समाधानमा ध्यान दिन सरोकारवालाको ध्यानाकर्षण गराए ।Adertisement
संयुक्त राष्ट्रसङ्घीय बडापत्र १९८९ मा उल्लेखित ‘राइट टु च्वाइस अफ एजुकेशन’ र नेपालको संविधान धारा ४४ को प्रावधान विपरीत सामुदायिक विद्यालयमा पढ्नैपर्ने बाध्यात्मक अवस्था सिर्जना नगर्न उनीहरुले जोड दिए ।
