काठमाडौं, माघ ७। सरकारले संघीय संसदको हिउँदे अधिवेशन बोलाउन राष्ट्रपति रामचन्द्र पौडेलसमक्ष सिफारिस गरेको छ । सोमवार (आज)बसेको मन्त्रिपरिषदको बैठकले माघ १८ गते संघीय संसदको दुवै सदनको बैठक बोलाउन सिफारिस गरेको हो ।
प्रधानमन्त्री ओलीले संसद अधिवेशन बोलाउनेबारे आजै सभामुख देवराज घिमिरेसँग छलफल गर्नुभएको थियो । विपक्षी दलहरूले सरकारले अधिवेशन नबोलाएर अध्यादेशबाट शासन गर्न खोजेको भन्दै आलोचना गरिरहेको बेला सरकारले अधिवेशन आह्वान गरेको हो ।
विशेष गरेर प्रतिपक्षी दल नेकपा माओवादी केन्द्रले सरकारले हिउँदे अधिवेशन बोलाउन ढिला गरेको भन्दै सरकारको ध्यानाकर्षण समेत गराएको थियो । अधिवेशन बोलाउन ढिला भएको भन्दै सभामुख देवराज घिमिरेले पनि असन्तुष्टि जनाउनु भएको थियो ।
