फाइल तस्बिर
नुवाकोट, माघ २६ । विदुर नगरपालिका वडा नम्बर ९ की वडा सदस्य धनमाया सुनारको त्रिशुली नदीमा डुबेर निधन भएको छ। शनिबार विहान विदुर नगरपालिका वडा नम्बर ५, देविघाटस्थित जालपा मन्दिरमा स्नान गर्ने क्रममा उनी नदीले बगाएको प्रहरीले जनाएको छ।
बेपत्ता भएकी सुनारको शव बेलकोटगढी नगरपालिका वडा नम्बर ७, महादेवफाँटीस्थित त्रिशुली नदीको किनारमा फेला परेको जिल्ला प्रहरी कार्यालय, नुवाकोटले पुष्टि गरेको छ। शवको त्रिशुली अस्पतालमा पोष्टमार्टमपछि परिवारको जिम्मा लगाइएको छ।
नेकपा एमाले नुवाकोट जिल्ला कमिटी सदस्य समेत रहेकी वडा सदस्य सुनारको असामयिक निधनप्रति विदुर नगरपालिकाको कार्यालयले गहिरो शोक व्यक्त गरेको छ। यसै सन्दर्भमा, विदुर नगर कार्यपालिकाको आकस्मिक बैठकले माघ २७ गते (आईतबार) एक दिन शोक विदा दिने निर्णय गरेको छ।शोक बिदाको दिन विदुर नगरपालिका कार्यालय, सम्पूर्ण वडा कार्यालय र स्वास्थ्य संस्थाहरू (आकस्मिक सेवा बाहेक) बन्द रहने नगर कार्यपालिकाले जनाएको छ।नगरको सूचना अनुसार नगरसँगसँग आवद्ध वडा कार्यालयहरु मात्रै बिदा रहने बताइएको छ ।
नगरपालिकाले दिवंगत आत्माको चिरशान्तिको कामना गर्दै शोकसन्तप्त परिवारजनप्रति गहिरो समवेदना व्यक्त गरेको छ।
