काठमाडौं । नेपाली कांग्रेसका महामन्त्री विश्वप्रकाश शर्माले नेकपा (माओवादी केन्द्र)का अध्यक्षलाई अरूले अध्यादेश ल्याउँदा चोरबाटो आफूले ल्याउँदा मूलबाटो हुन्छ ? भन्दै प्रश्न गर्नुभएको छ ।
आजको प्रतिनिधिसभा बैठकमा बोल्दै महामन्त्री शर्माले कांग्रेसले विषय र परिस्थिति अनुसार निर्णय गर्नेउल्लेख गर्नुभयो ।
“हिजो प्रतिपक्षमा छँदा वर्तमान प्रधानमन्त्री नै प्रधानमन्त्री भएका बेला जुन अध्यादेशका विरूद्ध संवैधानिक परिषद् भत्कने गरी आएको अध्यादेशको कांग्रेसले विरोध गरेको सम्झना छ,” उहाँले भन्नुभयो, “कुनै अध्यादेशलाई विरोध नगरेको र शान्त ढंगले सघाएको कुरा देशलाई कमै सम्झना छ ।”
महामन्त्री शर्माले गएको वैशाख २८ गते कांग्रेस प्रतिपक्षमा हुँदा पनि प्रचण्ड नेतृत्वको सरकारले ल्याएको लगानी सम्मेलन सम्बन्धी अध्यादेशलाई कांग्रेसले समर्थन गरेको बताउँदै अहिले आएको भूमिसम्बन्धि अध्यादेशका सम्बन्धमा विवादस्पद विषय भए प्रतिस्थापन विधेयकबाट सच्याउने गरी जानुपर्नेमा उल्लेख गर्नुभयो । त्यस्तै प्रचण्डले सरकार अप्राकृतिक भनेकोप्रति पनि शर्माले जवाफ थियो । “
कांग्रेस र माओवादी मिलेर सरकार बनाउँदा कसरी प्राकृतिक थियो ? कांग्रेस र एमाले मिलेर बनाउँदा कसरी अप्राकृतिक भयो ? गठबन्धनको सरकार बन्नु भनेको समयको, गणीतिय बाध्यता हो । सबै प्राकृतिक भनेर हामी पनि दाबी गरिरहेका छैनौं,” उहाँले भन्नुभयो ।
महामन्त्री शर्माले सामाजिक सञ्जालसम्बन्धी विधेयकमाथि प्रश्न उठाउँदै अध्यादेश भन्दैमा गलत नहुने र विधेयक भन्दैमा सही नहुने पनि बताउनुभयो ।
