खोप हस्तान्तरणको फाइल तस्बिर
विदुर । सरकारले घोषणा गरेको पाठेघरको क्यान्सर विरुद्धको खोप अभियान विदुर नगरपालिकामा सम्पन्न भएको छ ।
एच.पी.भी.खोप कार्यक्रमको राष्ट्रिय अभियान अन्तर्रगत बिदुर नगरपालिका, स्वास्थ्य शाखा मार्फत विभिन्न ४४ वटा बिद्यालय र १९ वटा स्वास्थ्य सँस्थामा सञ्चालन गरेको खोप कार्यक्रम अनुसार ९९.९ प्रतिशत किशोरीहरुले खोप लगाएको नगरपालिकाको स्वास्थ्य शाखाले जनाएको छ । स्वास्थ्य शाखाले दिएको जानकारी अनुसार नगरपालिकालभित्र कुल लक्ष्य २७५० रहेकोमा २७४७ किशोरीले खोप लगाएका छन् ।
नगरपालिकाले स्वास्थ्य शाखामार्फत खोपकेन्द्रहरुका लागि २७७७ खोप पठाएको थियो । खोप केन्द्रमार्फत लक्ष्य हासिल गर्न सफल भएकोमा विदुर नगरपालिका नगर प्रमुख राजन श्रेष्ठले खुशी व्यक्त गदै लक्ष्य हासिल गर्न अहोरात्र खटिनु हुने स्वास्थ्य शाखा टिम, स्वास्थ्यकर्मी, विद्यालय नर्स, महिलास्वास्थ्य स्वयम् सेविका, विद्यालय परिवार एंव नगरबासीप्रति आभार व्यक्त गर्नुभएको छ ।
मेयर श्रेष्ठले समाजिक सञ्जालमार्फत पनि विदुर नगरपालिकामा उत्साहजनक रुपमा कार्यक्रम सफल बनाउन सहजिकरण गर्ने जनस्वाथ्य कार्यालय नुवाकोट परिवार, बिदुर नगरपालिकाको विभिन्न जिम्मेवारीमा रहनुभएका जनप्रतिनिधिहरु, विद्यालयका शिक्षिका, शिक्षक, सञ्चारकर्मी, सरोकारवाला सम्पूर्णलाई आगामी दिनमा पनि नगरपालिका मार्फत सञ्चालित कार्यक्रमलाई सफल बनाउन सहयोगको अपिल समेत गर्नुभएको छ ।
सरकारले विद्यालय जाने र नजाने १० देखि १४ वर्ष उमेर समूहका किशोरीलाई खोप लगाउने लक्ष्य लिएको थियो । देशभर १६ लाख र नुावकोटमा ११ हजार किशोरीहरुलाई खोप लगाउने लक्ष्य रहेको छ । सोही लक्ष्य अनुसार माघ २२ देखि फागुन ७ गते सम्म खोप अभियान सञ्चालन हुनेछ ।
पछिल्लो समय पाठेघरको क्यान्सरका कारण महिलाको मृत्युदरको संख्या बढ्दै गएपछि सरकारले क्यान्सर नियन्त्रणका लागि खोप अभियान सञ्चालन गरेको हो । पहिलो चरणमा १० देखि १४ वर्ष मुनिका किशोरीहरुका लागि खोप लगाइएको छ भने दोस्रो चरणमा अन्य उमेर समूहका महिलाहरुलाई खोप लगाउने व्यवस्था गरिने स्वास्थ्य तथा जनसंख्या मन्त्रालयले जनाएको छ ।
