काठमाडौं । सत्तारुढ दल नेपाली कांग्रेसले तत्कालका लागि गणतान्त्रिक मोर्चा आवश्यक नभएको ठहर गरेको छ । पार्टी कार्यालय सानेपामा बसेको कार्यसम्पादन समिति बैठकले गणतन्त्रका पक्षमा संसद् र नागरिकको अधिकांश तप्का प्रतिबद्ध रहेको भन्दै गणतन्त्रवादीले मोर्चा खडा गर्नु नै आवश्यकता नरहेको निष्कर्ष निकालेको हो । बैठकपछि पार्टी प्रवक्ता डा. प्रकाशशरण महतले
निर्वाचित सार्वभौम संविधानसभाले जारी गरेको संविधानप्रति प्रतिबद्धता जाहेर गर्दै संविधानभित्रैबाट जनताका आकांक्षा सम्बोधन गर्न सकिन्छ र गर्नुपर्छ भन्ने निर्णय भएको जानकारी दिनुभयो । प्रवक्ता महतले भन्नुभयो,जुन किसिमबाट अहिले संविधानको खिलाफमा बहस गरिँदैछ, त्यसबारे हाम्रो धारणा राखिएको हो । जनतामा केही असन्तुष्टि छन् भने संविधानभित्रैबाट सम्बोधन गर्न सकिन्छ भन्ने हाम्रो निश्कर्ष रह्यो ।
प्रधानमन्त्रीसहित विपक्षी दलका नेताले राखेको गणतान्त्रिक मोर्चा आवश्यक नभएको निश्कर्षका निकाल्दै सत्तापक्षका दल मात्र नभई प्रतिपक्षमा रहेका समेत दलको गणतन्त्रमा प्रतिबद्ध रहेकाले गणतन्त्रका विषयमा मोर्चा बनाउन जरुरी नभएको बैठकपछि महतले जानकारी दिनुभयो । बैठकले अहिले असन्तोष जाहेर गरिरहेका पार्टीलाई पनि संविधानभित्रै रहेर समाधानको प्रयास गर्न सुझाव दिने निर्णय समेत गरेको छ ।
