नुवाकोट पुकार
बेलकोटगढी (नुवाकोट), असार १५ गते । बेलकोटगढी नगरपालिका–१० ले ज्येष्ठ नागरिकप्रति सम्मान, कृतज्ञता र सामाजिक उत्तरदायित्वलाई व्यवहारमा उतार्ने उद्देश्यले ७० वर्ष वा सोभन्दा माथिका सामाजिक सुरक्षा भत्ता प्राप्त गरिरहेका ज्येष्ठ नागरिकलाई सम्मानस्वरूप छाता तथा पदयात्रा (हिँड्ने) लौरो वितरण गरेको छ।
वडा कार्यालयको आयोजनामा सम्पन्न कार्यक्रममा ज्येष्ठ नागरिकलाई सम्मानपूर्वक सामग्री हस्तान्तरण गर्दै परिवार, समाज र राष्ट्र निर्माणमा उहाँहरूले पुर्याउनुभएको अतुलनीय योगदानप्रति कृतज्ञता व्यक्त गरिएको थियो। वर्षायाम तथा घामबाट सुरक्षा प्रदान गर्नुका साथै दैनिक हिँडडुललाई सहज र सुरक्षित बनाउने उद्देश्यले छाता र पदयात्रा लौरो वितरण गरिएको वडा कार्यालयले जनाएको छ।
कार्यक्रमको विशेष आकर्षण ७० वर्ष उमेर पूरा गरिसकेका पूर्व जनप्रतिनिधिको सम्मान रहेको थियो। गाउँ तथा समाजको विकास, स्थानीय शासनको सुदृढीकरण र जनसेवामा उल्लेखनीय योगदान पुर्याउनुभएका पूर्व जनप्रतिनिधि खोपप्रसाद पाण्डे, खोपराज पाण्डे तथा कालीबहादुर तिवारीलाई सम्मानपत्रसहित विशेष सम्मान गरिएको थियो। कार्यक्रममा उहाँहरूको नेतृत्व, इमानदारी, समर्पण र जनसेवाप्रतिको निष्ठाको उच्च प्रशंसा गर्दै समाजमा पुर्याएको योगदान सधैँ स्मरणीय रहने उल्लेख गरिएको थियो।
कार्यक्रमलाई सम्बोधन गर्दै वडा अध्यक्ष प्रल्लाद प्रसाद थपलियाले ज्येष्ठ नागरिक समाजका जीवित इतिहास, अनुभवका भण्डार र मार्गदर्शक व्यक्तित्व भएको उल्लेख गर्दै उहाँहरूको सम्मान गर्नु स्थानीय सरकारको दायित्व भएको बताउनुभयो। उहाँले वितरण गरिएका छाता र पदयात्रा लौरोले ज्येष्ठ नागरिकको दैनिक जीवनलाई सहज बनाउने विश्वास व्यक्त गर्दै विगतमा जनप्रतिनिधिका रूपमा गाउँ र समाजको विकासमा योगदान पुर्याएका अग्रजलाई सम्मान गर्न पाउनु गौरवको विषय भएको बताउनुभयो। उहाँले आगामी दिनमा पनि ज्येष्ठ नागरिकको सम्मान, स्वास्थ्य, सुरक्षा र सामाजिक सहभागितालाई केन्द्रमा राखेर यस्ता जनमुखी कार्यक्रमलाई निरन्तरता दिइने प्रतिबद्धता व्यक्त गर्नुभयो।
सम्मानित पूर्व जनप्रतिनिधि कालीबहादुर तिवारीले स्थानीय सरकारले आफ्नो योगदानको कदर गर्दै सम्मान गरेकोमा आभार व्यक्त गर्दै यो सम्मान तीन जना व्यक्तिमा मात्र सीमित नभई गाउँ र समाजको हितका लागि निस्वार्थ सेवा गर्ने सम्पूर्ण अग्रज जनप्रतिनिधिप्रतिको सम्मान भएको बताउनुभयो। यस्ता कार्यक्रमले सेवा गर्ने संस्कृतिलाई सम्मान गर्नुका साथै नयाँ पुस्तालाई समाजप्रति जिम्मेवार बन्न प्रेरणा दिने उहाँको भनाइ थियो।
कार्यक्रममा सहभागी ज्येष्ठ नागरिकहरूले स्थानीय सरकारले आफूहरूलाई सम्मानपूर्वक सम्झिएकोमा खुसी व्यक्त गर्दै यस्ता कार्यक्रमले आत्मीयता, अपनत्व र सम्मानको अनुभूति गराएको बताए। स्थानीयवासीले पनि वडाको यस पहललाई ज्येष्ठ नागरिकप्रतिको सम्मान, सामाजिक उत्तरदायित्व तथा अग्रजहरूको योगदानको उचित कदर गर्ने अनुकरणीय कार्यका रूपमा प्रशंसा गरेका छन्।
कार्यक्रमले ज्येष्ठ नागरिकप्रति सम्मान व्यक्त गर्नुका साथै विगतमा गाउँ र समाजको नेतृत्व सम्हाल्दै विकासको आधार निर्माण गरेका अग्रजहरूको योगदानलाई नयाँ पुस्तासामु स्मरण गराउने महत्वपूर्ण सन्देश दिएको सहभागीहरूको भनाइ थियो। स्थानीय सरकारले आगामी दिनमा पनि यस्ता मानवीय, जनमुखी र सम्मानमुखी कार्यक्रमलाई निरन्तरता दिने प्रतिबद्धता जनाएको छ।
तपाईको प्रतिक्रिया दिनुहोस्